نیویارک شہر کے میئر کے لیے ڈیموکریٹک امیدوار زہران ممدانی نے ایک تہلکہ خیز اعلان میں کہا ہے کہ اگر وہ الیکشن جیت گئے تو اسرائیلی وزیراعظم نیتن یاہو کو نیویارک آمد پر گرفتار کرنے کا حکم دیں گے۔
زہران ممدانی کا کہنا ہے کہ اس اقدام کا مقصد دنیا کو یہ واضح پیغام دینا ہے کہ نیویارک بین الاقوامی قوانین کا احترام کرتا ہے اور جنگی جرائم پر کسی کو استثنیٰ نہیں ملنا چاہیے۔
ان کے اس بیان نے امریکی سیاست میں نئی بحث چھیڑ دی ہے۔ صدر ڈونلڈ ٹرمپ نے بھی اس معاملے پر تبصرہ کرتے ہوئے کہا کہ ممدانی کی کامیابی کے امکانات کافی روشن ہیں۔
ٹرمپ کے مطابق اگر وہ جیت گئے تو یہ عوامی بغاوت اور موجودہ نظام سے نالاں عوام کے جذبات کا نتیجہ ہوگا۔
واضح رہے کہ نیویارک کے میئر کا انتخاب 4 نومبر کو ہوگا۔ اس مقابلے میں ڈیموکریٹک امیدوار زہران ممدانی کا سامنا ریپبلکن امیدوار کرٹیس سیلوا، سابق گورنر اینڈریو کومو اور موجودہ میئر ایرک ایڈمز سے ہوگا۔
سیاسی مبصرین کا کہنا ہے کہ امکان ہے کہ ایرک ایڈمز انتخابی دوڑ سے الگ ہو جائیں گے، جس کے بعد یہ مقابلہ مزید سخت اور دلچسپ شکل اختیار کر سکتا ہے۔