اسرائیلی حکومت نے اعلان کیا ہے کہ مصری ٹیم کو غزہ میں داخل ہو کر ہلاک یرغمالیوں کی لاشوں کی تلاش کی اجازت دے دی گئی ہے۔ اسرائیلی حکومت کے ترجمان کے مطابق، مصری ٹیم کے ہمراہ ریڈ کراس کے اہلکار بھی ہوں گے، جو ییلو لائن کے پار جا کر لاشوں کی تلاش اور بازیابی کا عمل انجام دیں گے۔
ترجمان نے زور دیا کہ اس کارروائی کے دوران اسرائیل غزہ کی پٹی پر مکمل سکیورٹی کنٹرول برقرار رکھے گا، جبکہ بین الاقوامی ٹیموں کی سرگرمیوں پر اسرائیلی فورسز کی براہِ راست نگرانی جاری رہے گی تاکہ کسی بھی ممکنہ خطرے سے بروقت نمٹا جا سکے۔
دوسری جانب، اسرائیلی وزیراعظم نے ایک بیان میں کہا ہے کہ غزہ میں بین الاقوامی فورس کی تعیناتی سے متعلق حتمی فیصلہ اسرائیل خود کرے گا۔
ان کے بقول، غزہ کی سکیورٹی اور مستقبل کے انتظامات پر حتمی اختیار اسرائیل کے پاس ہی رہے گا۔
ذرائع کے مطابق، مصری اور ریڈ کراس ٹیمیں آئندہ چند دنوں میں غزہ کے شمالی اور وسطی علاقوں میں تلاش کا عمل شروع کریں گی، جہاں متعدد یرغمالیوں کے ہلاک ہونے کا خدشہ ظاہر کیا جا رہا ہے۔