امریکی صدر ڈونلڈ ٹرمپ نے خبردار کیا ہے کہ اگر حماس نے یرغمالیوں کی لاشیں واپس نہ کیں تو امن معاہدے میں شامل ممالک مشترکہ کارروائی کریں گے۔ غیر ملکی میڈیا کے مطابق صدر ٹرمپ نے اپنے بیان میں کہا کہ غزہ میں موجود یرغمالیوں کی واپسی کے حوالے سے آئندہ 48 گھنٹوں میں ہونے والی پیش رفت پر گہری نظر رکھی جا رہی ہے۔
انہوں نے واضح کیا کہ اگر حماس نے تعاون نہ کیا اور یرغمالیوں کی لاشیں واپس نہ کیں تو امن معاہدے میں شریک ممالک متفقہ طور پر اقدام کریں گے۔
دوسری جانب، آسیان سربراہی اجلاس میں شرکت کے لیے ملائیشیا روانگی کے دوران امریکی صدر نے قطر کے دارالحکومت دوحہ میں مختصر قیام کیا، جہاں ان کی امیرِ قطر سے ملاقات ہوئی۔
ملاقات کے دوران ٹرمپ نے بتایا کہ اگر ضرورت پیش آئی تو قطر غزہ میں امن فوج بھیجنے کے لیے تیار ہے۔