امریکی صدر ڈونلڈ ٹرمپ نے جمعرات کو اعلان کیا ہے کہ وہ روسی صدر ولادیمیر پیوٹن سے ہنگری کے دارالحکومت بوداپسٹ میں ملاقات کریں گے تاکہ روس اور یوکرین کے درمیان جاری جنگ کے خاتمے کے امکانات پر بات کی جا سکے۔ یہ اعلان دونوں رہنماؤں کے درمیان طویل ٹیلی فونک گفتگو کے بعد سامنے آیا۔
ٹرمپ نے سوشل میڈیا پلیٹ فارم “ٹروتھ سوشل” پر بیان میں کہا کہ “صدر پیوٹن اور میں بوداپسٹ میں ملاقات کریں گے تاکہ جائزہ لیا جا سکے کہ ہم اس ‘بدنام زمانہ’ جنگ کا خاتمہ کر سکتے ہیں یا نہیں۔
کل میری وائٹ ہاؤس کے اوول آفس میں صدر زیلنسکی سے ملاقات ہوگی، جہاں ہم صدر پیوٹن سے ہونے والی گفتگو سمیت کئی اہم امور پر بات کریں گے۔”
سی این این کے مطابق، کریملن کے ایک مشیر نے بتایا کہ یہ کال روس کی درخواست پر کی گئی اور تقریباً ڈھائی گھنٹے جاری رہی۔ اس گفتگو کے بعد صدر ٹرمپ کے لہجے میں روس کے حوالے سے واضح تبدیلی دیکھی گئی۔
بعد ازاں اوول آفس میں ایک تقریب کے دوران صحافیوں سے بات کرتے ہوئے ٹرمپ نے کہا کہ امریکی وزیر خارجہ مارکو روبیو آئندہ ہفتے روسی حکام سے ملاقات کے لیے ایک اعلیٰ سطحی وفد کی قیادت کریں گے اور ملاقات کی جگہ جلد طے کر لی جائے گی۔
صدر ٹرمپ نے مزید کہا کہ روسی صدر نے امریکی خاتون اوّل کی جانب سے بچوں کے لیے کیے گئے کام پر ان کا شکریہ ادا کیا۔
خیال رہے کہ یوکرینی صدر وولودیمیر زیلنسکی آج وائٹ ہاؤس پہنچ رہے ہیں اور اس سے قبل ٹرمپ کی پیوٹن سے گفتگو میں بڑی پیشرفت نے یوکرین جنگ کے خاتمے کے امکانات روشن کردیئے ہیں۔