امریکی صدر ڈونلڈ ٹرمپ کا کہنا ہے کہ چین کے ساتھ روس، یوکرین اور غزہ کے معاملات پر بات چیت جاری ہے اور وہ چاہتے ہیں کہ چین کے ساتھ تعاون بڑھایا جائے۔ صدر ٹرمپ نے کہا کہ ٹک ٹاک پر سخت کنٹرول کیا جائے گا اور چینی صدر کی جانب سے اس حوالے سے ڈیل منظور ہونے پر وہ مشکور ہیں۔
وائٹ ہاؤس میں میڈیا سے گفتگو کرتے ہوئے انہوں نے بتایا کہ ترک صدر رجب طیب اردوان کے ساتھ بڑے تجارتی اور دفاعی معاہدوں پر کام جاری ہے اور وہ 25 ستمبر کو ترک صدر کا وائٹ ہاؤس میں استقبال کریں گے۔
صدر ٹرمپ نے مزید کہا کہ انہوں نے گولڈ کارڈ کے اجرا کے لیے صدارتی حکم نامے پر دستخط کر دیے ہیں۔
بگرام ایئربیس کے حوالے سے گفتگو میں انہوں نے کہا کہ بگرام ایئربیس چھوڑنا ایک شرمناک لمحہ تھا، اور اب اسے واپس لینے کے لیے افغانستان کے ساتھ مذاکرات جاری ہیں۔
صدر ٹرمپ نے واضح کیا کہ ان مذاکرات کی قیادت امریکی نمائندہ خصوصی ایڈم بوہلر کر رہے ہیں۔
ٹرمپ نے کہا کہ بگرام ایئربیس چینی نیوکلیئر سائٹ کے بہت قریب ہے اور یہ اُس مقام سے صرف ایک گھنٹے کے فاصلے پر ہے جہاں چین اپنے جوہری ہتھیار تیار کرتا ہے۔
امریکی اخبار کی رپورٹ کے مطابق بگرام ایئربیس پر محدود تعداد میں امریکی فوج کی دوبارہ تعیناتی پر غور کیا جا رہا ہے۔