شمالی امریکی ملک میکسیکو میں شدید بارشوں اور سیلاب نے بڑے پیمانے پر تباہی مچادی، مختلف حادثات میں کم از کم 130 افراد ہلاک اور درجنوں لاپتہ ہو گئے۔ غیر ملکی میڈیا کے مطابق بارش اور سیلاب سے تقریباً ایک لاکھ مکانات متاثر ہوئے جبکہ سڑکیں، پل اور دیگر بنیادی انفراسٹرکچر بھی شدید نقصان کا شکار ہوئے۔
حکام کے مطابق وسطی ریاستوں میں بارش نے سب سے زیادہ تباہی پھیلائی، اور 5 ریاستوں میں بجلی کا نظام مکمل طور پر درہم برہم ہو گیا۔
میکسیکو کی صدر نے کہا کہ اتنی شدید بارشوں کی پیش گوئی نہیں تھی اور حکام نے مزید ممکنہ نقصانات کا خدشہ ظاہر کیا ہے۔
ریسکیو ٹیمیں پانی میں پھنسے شہریوں کو نکالنے اور فوری امدادی سامان پہنچانے میں مصروف ہیں، جبکہ متاثرہ علاقوں میں امدادی کارروائیاں جاری ہیں۔
حکام کے مطابق 10 ہزار سے زائد فوجی اہلکار ریسکیو مشینری اور گاڑیوں کے ساتھ امداد کی تقسیم میں حصہ لے رہے ہیں جبکہ بے گھر ہونے والے افراد کے لیے عارضی شیلٹرز قائم کر دیے گئے ہیں۔