حماس کا ٹرمپ کے امن منصوبے پر عملدرآمد کا اعلان حماس نے امریکی صدر ڈونلڈ ٹرمپ کے غزہ امن منصوبے پر عملدر آمد کا اعلان کردیا ہے۔ حماس نے صدر ٹرمپ کے منصوبے پر اپنا جواب ثالثوں کو پہنچا دیا ہے، جس کے جواب میں ڈونلڈ ٹرمپ نے اسرائیل کو فوری طور پر غزہ پر بمباری روکنے کی ہدایت کردی ہے۔
برطانوی خبر رساں ادارے کے مطابق صدر ٹرمپ کا بیس نکاتی غزہ امن منصوبہ حماس نے بڑی حد تک قبول کرلیا ہے۔ حماس کے مطابق وہ تمام یرغمالیوں زندہ یا مردہ کو واپس کرنے پر آمادہ ہوگئے ہیں۔ وہ ثالثوں کے ذریعے مذاکرات میں شامل ہونے کو بھی تیار ہے۔
حماس غزہ کا انتظام آزاد ٹیکنوکریٹس کی فلسطینی باڈی کے حوالے کرے گی جبکہ ہتھیار مستقبل کے فلسطینی حکمرانوں کے حوالے کئے جائیں گے۔ حماس نے جنگ بندی کے لئے عرب،اسلامی،بین الاقوامی اور صدر ٹرمپ کی کوششوں کو سراہا۔
حماس کے مطابق اس نے اپنی قیادت، فلسطینی دھڑوں، فورسز، ثالثوں اور دوستوں سے مشاورت کی ہے۔ حماس غزہ کی جنگ ختم کرنے اور اسرائیلی افواج کے مکمل انخلا کی صورت میں تمام اسرائیلی یرغمالیوں کو رہا کرنے کو تیار ہے۔
اسرائیلی فوج کے غزہ سے مکمل انخلا تک حماس غیرمسلح نہیں ہوگی، فلسطینی تنظیم کا کہنا ہے کہ معاملے کی تفصیلات پر مزید بات چیت کیلئے مذاکرات میں شامل ہونے کو بھی تیار ہیں۔ حماس کے بیان پر صدر ٹرمپ نے اپنے ردعمل میں کہا کہ آج بڑا دن ہے، حماس پائیدار امن کیلئے تیار ہوگیا ہے، اس موقع پر امریکی صدر نے قطر، مصر، سعودی عرب سمیت دیگر ممالک کا شکریہ ادا کیا۔ غزہ میں امریکی صدر نے کہا کہ سعودی عرب و دیگر ممالک نے جنگ روکنے کے تاریخی لمحے تک پہنچنے میں ہمارا ساتھ دیا، ہم یرغمالیوں کے اپنے خاندانوں کے پاس واپسی کے منتظر ہیں۔