ایرانی سپریم لیڈر آیت اللہ علی خامنہ ای نے امریکا کے سامنے جھکنے سے دو ٹوک انکار کرتے ہوئے واضح کیا ہے کہ ایران واشنگٹن کے دباؤ کو کبھی قبول نہیں کرے گا۔
ایرانی سپریم لیڈر آیت اللہ خامنہ ای نے کہا کہ امریکا کی خواہش ہے ایران اس کی فرمانبرداری کرے لیکن یہ ناممکن ہے، ایران اپنی خودمختاری پر کوئی سمجھوتہ نہیں کرے گا،ایران امریکا کی فرمانبرداری کے مطالبے کے خلاف خم ٹھونک کر کھڑا رہے گا۔
ایرانی سپریم لیڈر کا کہنا تھا کہ مسائل کے حل کے لیے واشنگٹن سے براہ راست مذاکرات کی خواہش رکھنے والے لوگ کم عقل ہیں، مخالفین ایران کے اندر تفرقہ پیدا کرنے کی کوشش میں لگے ہوئے ہیں ان کی یہ خواہش کبھی پوری نہیں ہو گی۔
ایران کے سپریم لیڈر آیت اللہ علی خامنہ ای نے سوشل میڈیا پلیٹ فارم ”ایکس“ پر جاری اپنے ایک بیان میں کہا ہے کہ امریکا نے صیہونیوں کو ایران پر حملہ کرنے کے لیے اکسایا اور انہیں ایران کو ختم کرنے کا ٹاسک دیا۔
انہوں نے خبردار کیا کہ امریکا اور اس کے اتحادی یہ سمجھنے میں ناکام رہے کہ ایران کا ردعمل ان کے لیے شدید پچھتاوے کا باعث بنے گا۔
خامنہ ای نے اپنے پیغام میں مزید کہا کہ ایران دشمن قوتوں کے کسی بھی حملے کا بھرپور اور سخت جواب دینے کی صلاحیت رکھتا ہے اور ماضی کی طرح آئندہ بھی اپنی خودمختاری اور سلامتی کا دفاع کرے گا۔
یاد رہے کہ ایران اسرائیل جنگ کے بعد ایرانی سپریم لیڈر آیت اللہ خامنہ ایک نے کہا تھا کہ امریکا اس جنگ میں اس لیے شریک ہوا کہ اسے لگا اگر وہ ایسا نہ کرتا تو اسرائیل مکمل تباہ و برباد ہوجاتا، امریکا کو اس جنگ سے کوئی خاص کامیابی حاصل نہیں ہوئی۔
ایرانی سپریم لیڈر کا یہ بیان ایسے وقت سامنے آیا ہے جب خطے میں کشیدگی بدستور موجود ہے اور عالمی طاقتیں ایران کو مذاکرات کی میز پر لانے کی کوشش کر رہی ہیں، تاہم خامنہ ای کے اس موقف نے واضح کر دیا ہے کہ ایران اپنی پالیسیوں اور خودمختاری پر کسی بھی بیرونی دباؤ کے سامنے سر تسلیم خم نہیں کرے گا۔