مصر کے شہر شرم الشیخ میں عالمی امن اجلاس کے دوران ترک صدر رجب طیب اردوان اور اطالوی وزیراعظم جورجیا میلونی کے درمیان دلچسپ اور ہنسی مذاق سے بھرپور مکالمہ ہوا، جس نے حاضرین کو قہقہوں پر مجبور کر دیا۔ اس دلچسپ گفتگو کی ویڈیو سوشل میڈیا پر وائرل ہو گئی ہے۔
رپورٹس کے مطابق اجلاس میں دنیا کے متعدد رہنما اسرائیل اور حماس کے درمیان حالیہ جنگ بندی کی حمایت اور غزہ کی تعمیر نو پر بات چیت کر رہے تھے۔
اور اسی دوران اردوان اور میلونی کے درمیان یہ ہلکی پھلکی بات چیت سامنے آئی۔
ترک صدر اردوان نے اطالوی وزیراعظم سے کہا، “آپ بہت اچھی لگ رہی ہیں، لیکن میں چاہتا ہوں کہ آپ اپنی سگریٹ نوشی چھوڑ دیں۔”
میلونی نے ہنستے ہوئے جواب دیا، “جی ہاں، میں جانتی ہوں، لیکن میں اسے زیادہ سنجیدگی سے نہیں لوں گی۔”
اس پر اردوان اور موجود دیگر رہنماؤں نے قہقہہ لگایا، اور ماحول میں خوشگوار ہنسی کی لہر دوڑ گئی۔
مصر کے صدر عبد الفتاح السیسی اور امریکی صدر ڈونلڈ ٹرمپ کی سربراہی میں ہونے والے اس اجلاس میں 20 سے زائد سربراہانِ مملکت شریک تھے۔
جہاں زیادہ تر گفتگو جنگ بندی کو برقرار رکھنے اور غزہ کی بحالی پر مرکوز تھی، اردوان اور میلونی کا یہ ہلکا پھلکا مکالمہ ایک خوشگوار وقفہ ثابت ہوا۔