امریکی صدر ڈونلڈ ٹرمپ اور نوبیل امن انعام یافتہ وینزویلا کی رہنما ماریا کورینا مچاڈو کے درمیان ٹیلی فونک گفتگو ہوئی۔ رپورٹس کے مطابق، مچاڈو نے گفتگو کے دوران صدر ٹرمپ سے کہا کہ میں یہ انعام آپ کے اعزاز میں قبول کر رہی ہوں، کیونکہ امن کے اصل حقدار آپ ہیں۔
اس پر صدر ٹرمپ نے مسکراتے ہوئے کہا کہ میں نے یہ نہیں کہا کہ پھر انعام مجھے دے دو، لیکن شاید وہ دینا چاہتی تھیں۔ بہرحال، میں خوش ہوں کیونکہ میں نے لاکھوں زندگیاں بچائی ہیں۔
دوسری جانب، نوبیل انعام جیتنے کے بعد ماریا کورینا مچاڈو ماضی کے ایک متنازع بیان کے باعث شدید تنقید کی زد میں آگئی ہیں۔
سوشل میڈیا پر ان کا پرانا پیغام وائرل ہو رہا ہے، جس میں وہ غزہ جنگ کے دوران اسرائیل کو “آزادی کا علمبردار” قرار دیتی نظر آتی ہیں۔
خیال رہے کہ 2025ء کا نوبیل امن انعام وینزویلا کی جمہوریت نواز رہنما ماریا کورینا مچاڈو کو دیا گیا ہے۔ رواں سال اس انعام کے لیے 300 سے زائد شخصیات کو نامزد کیا گیا تھا۔