کراچی ٹریفک پولیس اور لوک سہائتہ نے مشترکہ طور پر شہر میں جدید ڈیجیٹل ٹریفک قوانین پر عملدرآمد کے لیے ایک بڑے پیمانے پر آگاہی مہم شروع کر دی ہے۔
ترجمان ٹریفک پولیس کے مطابق یہ اقدام شہریوں کو جدید ٹیکنالوجی کے ذریعے ٹریفک قوانین پر عمل درآمد یقینی بنانے کے لیے کیا جا رہا ہے، یکم اکتوبر 2025 سے خودکار ای چالان سسٹم باضابطہ طور پر نافذ ہو جائے گا۔
ملک بھر میں انٹرنیٹ کی رفتار انتہائی سست، صارفین پریشان
ترجمان کے مطابق خلاف ورزیاں جدید سرویلنس کیمروں کے ذریعے ریکارڈ ہوں گی اور فوٹو یا ویڈیو شواہد کے ساتھ براہِ راست ای چالان شہریوں کے گھروں میں بھیجے جائیں گے، اس نظام سے افسران کی براہِ راست مداخلت ختم ہو جائے گی اور شفافیت یقینی بنائی جائے گی۔
مہم کے دوران بڑے چوراہوں اور سگنلز پر شہریوں میں پمفلٹس تقسیم کئے جا رہے ہیں، جبکہ رضاکار، خواتین پولیس اہلکار اور طلبہ بھی عوام کو ٹریفک قوانین پر عملدرآمد اور سڑکوں پر احتیاط برتنے کے حوالے سے آگاہ کر رہے ہیں۔
ٹریفک پولیس حکام کے مطابق اس مہم کا مقصد شہریوں کو نہ صرف روڈ سیفٹی کی اہمیت اجاگر کرنا ہے بلکہ آنے والے ڈیجیٹل ای چالان سسٹم سے بھی متعارف کرانا ہے، جو کراچی میں ایک زیادہ محفوظ اور منظم ٹریفک ماحول بنانے میں اہم کردار ادا کرے گا۔