پاکستانی اسٹارٹ اپ نے ایک ایسی جدید ڈیوائس تیار کر لی ہے جو گیزر پر لگانے سے گیس کے بلوں میں نمایاں کمی لا سکتی ہے۔ اس ڈیوائس کے حوالے سے دعویٰ کیا گیا ہے کہ اسے استعمال کرنے سے صارفین کے بل 70 فیصد تک کم ہو سکتے ہیں۔
یہ انکشاف نیشنل انکیوبیشن سنٹر اسلام آباد میں منعقدہ بریفنگ کے دوران ثناء خٹک نے کیا۔ انہوں نے بتایا کہ اس ڈیوائس کو “ایزی گیزر ڈیوائس” کا نام دیا گیا ہے اور یہ انٹرنیٹ کے ذریعے چلتی ہے۔ ڈیوائس میں جدید سینسرز نصب کیے گئے ہیں جو پانی کے درجہ حرارت اور گیس کے استعمال کو کنٹرول کرتے ہیں، اس طرح غیر ضروری گیس کے ضیاع کو روکا جا سکتا ہے۔
ثناء خٹک نے کہا کہ پاکستان میں گیس کے بڑھتے ہوئے بحران اور مہنگائی کے پیشِ نظر یہ ڈیوائس ایک گیم چینجر ثابت ہو سکتی ہے۔ ان کا کہنا تھا کہ اکثر گھروں میں گیزر دن بھر آن رہتے ہیں جس کی وجہ سے گیس کا استعمال بہت زیادہ ہو جاتا ہے، لیکن ایزی گیزر ڈیوائس کے ذریعے گیزر صرف اسی وقت فعال ہوتا ہے جب پانی گرم کرنے کی ضرورت ہو۔
انہوں نے مزید بتایا کہ یہ ڈیوائس اسمارٹ فون ایپ کے ساتھ منسلک کی جا سکتی ہے جس کے ذریعے صارفین اپنے گیزر کو دور بیٹھے بھی کنٹرول کر سکیں گے۔ اس فیچر سے نہ صرف سہولت ملے گی بلکہ گیس کی بچت بھی ممکن ہوگی۔
ٹیکنالوجی ماہرین کے مطابق یہ ایجاد پاکستان جیسے ملک کے لیے انتہائی اہمیت کی حامل ہے جہاں توانائی کا بحران شدت اختیار کرتا جا رہا ہے۔ ان کا کہنا ہے کہ اگر اس ڈیوائس کو بڑے پیمانے پر متعارف کرایا جائے تو گھریلو صارفین کے ساتھ ساتھ تجارتی شعبہ بھی اس سے فائدہ اٹھا سکتا ہے۔
عوامی حلقوں میں اس ڈیوائس کی خبر کو خوش آئند قرار دیا جا رہا ہے اور توقع کی جا رہی ہے کہ مارکیٹ میں آنے کے بعد یہ مصنوعات عام آدمی کے توانائی کے اخراجات کم کرنے میں مددگار ثابت ہوگی۔