اسمارٹ فون کی بیٹری چند ماہ کے استعمال کے بعد کمزور ہوجانا ایک عام مسئلہ بن چکا ہے۔ چاہے فون نیا ہو یا مہنگا، وقت گزرنے کے ساتھ بیٹری کی کارکردگی میں کمی تقریباً ناگزیر ہے۔ لیکن اس کی اصل وجوہات کیا ہیں؟ آئیے سمجھنے کی کوشش کرتے ہیں کہ ایسا کیوں ہوتا ہے۔
بیٹری دراصل ایک کیمیائی آلہ ہے جو توانائی کو ذخیرہ کرتی اور فراہم کرتی ہے۔ زیادہ تر اسمارٹ فونز میں لیتھیئم آئن بیٹریاں استعمال ہوتی ہیں جو وقت کے ساتھ اپنی صلاحیت کھوتی جاتی ہیں۔
جب فون بار بار چارج اور ڈسچارج ہوتا ہے، تو بیٹری کے اندر موجود کیمیائی اجزا کمزور ہونے لگتے ہیں، جس سے چارج برقرار رکھنے کی صلاحیت متاثر ہوتی ہے۔ ایک بڑی وجہ زیادہ درجہ حرارت بھی ہے۔ جب فون لمبے وقت تک دھوپ میں رہتا ہے یا چارجنگ کے دوران گرم ہوجاتا ہے تو بیٹری کے اندرونی اجزا کو نقصان پہنچتا ہے۔
یہ نقصان وقتی نہیں بلکہ مستقل ہوتا ہے، جس کا مطلب ہے کہ ہر بار زیادہ حرارت لگنے سے بیٹری کی عمر کم ہوتی جاتی ہے۔ اسی طرح زیادہ چارجنگ یا مکمل ڈسچارج بھی نقصان دہ ثابت ہوتی ہے۔ اکثر لوگ فون کو رات بھر چارج پر لگائے رکھتے ہیں، جس سے بیٹری مسلسل زیادہ وولٹیج پر رہتی ہے۔
یہ عمل بیٹری کے اندرونی خلیوں پر دباؤ ڈالتا ہے، اور کچھ عرصے بعد بیٹری کی مجموعی کارکردگی گر جاتی ہے۔ دوسری طرف بیٹری کو مکمل طور پر خالی ہونے دینا بھی نقصان دہ ہے کیونکہ یہ خلیوں کو غیر متوازن کردیتا ہے۔
مزید برآں، تیز چارجرز بھی بیٹری کی صحت پر اثر انداز ہوتے ہیں۔ اگرچہ فاسٹ چارجنگ سہولت وقت بچاتی ہے، لیکن یہ بیٹری میں زیادہ حرارت پیدا کرتی ہے، جو لمبے عرصے میں کارکردگی کو متاثر کرتی ہے۔
اسمارٹ فون چارج کرنے کا بہترین وقت؟ جب بیٹری بالکل ختم ہوجائے یا آدھی ہو؟
پسِ منظر میں چلنے والی ایپس بھی بیٹری کو کمزور کرنے میں کردار ادا کرتی ہیں۔ جب فون پر بہت سی ایپس بیک گراونڈ میں فعال رہتی ہیں تو بیٹری پر مسلسل دباؤ رہتا ہے۔ اس کے نتیجے میں چارج سائیکل زیادہ تیزی سے استعمال ہوتے ہیں، اور بیٹری جلدی کمزور ہو جاتی ہے۔
اگر آپ بیٹری کی عمر بڑھانا چاہتے ہیں تو چند احتیاطی تدابیر مددگار ثابت ہوسکتی ہیں۔ فون کو زیادہ گرم ماحول میں استعمال نہ کریں، چارجنگ کے دوران کور ہٹا دیں، اور بیٹری کو ہمیشہ 20 سے 80 فیصد کے درمیان رکھیں۔ اس کے علاوہ غیر ضروری ایپس بند رکھنا اور اسکرین کی برائٹنس کم کرنا بھی فائدہ مند ہے۔
یاد رکھیں کہ بیٹری ایک استعمالی جزو ہے، جسے وقت کے ساتھ کمزور ہونا ہی ہے، لیکن صحیح طریقے اپنانے سے آپ اس کی عمر کو نمایاں طور پر بڑھا سکتے ہیں۔ یہ نہ صرف فون کی کارکردگی برقرار رکھتا ہے بلکہ روزمرہ استعمال کو بھی زیادہ آسان بناتا ہے۔