سندھ حکومت نے صوبے کے 6 بڑے شہروں میں پاکستان اور بھارت کے درمیان ایشیا کپ فائنل میچ بڑی اسکرین پر دکھانے کا اعلان کر دیا ہے۔ ایشیا کپ ٹی ٹوئنٹی کا فائنل آج پاکستان اور بھارت کے درمیان دبئی میں کھیلا جائے گا، اور 41 سالہ ایشیا کپ کی تاریخ میں یہ پہلا موقع ہے کہ فائنل میں دونوں ٹیمیں ایک دوسرے کے سامنے ہوں گی۔
فائنل کے لیے گرین شرٹس پُرعزم ہیں اور جیت کے لیے مکمل تیار ہیں، جبکہ شائقین بھی جوش و خروش سے بھرپور ہیں اور پاکستان کی فتح کی امیدیں برقرار ہیں۔
سندھ حکومت نے فیصلہ کیا ہے کہ صوبے کے بڑے شہروں میں بڑی اسکرینوں پر میچ دکھایا جائے گا تاکہ شائقین بھرپور انداز میں کرکٹ کا لطف اٹھا سکیں۔
وزیر کھیل سندھ کے مطابق کراچی میں سندھ یوتھ کلب گلستان جوہر جبکہ حیدرآباد میں سندھ اسپورٹس بورڈ ہاسٹل میں پاک بھارت میچ دکھایا جائے گا۔
وزیر کھیل سندھ کے مطابق گھوٹکی میں علی محمد خان مہر اسپورٹس کمپلیکس اور شہید بینظیرآباد میں بلاول اسپورٹس کمپلیکس میں بڑی اسکرین پر میچ دکھایا جائے گا۔
اس کے علاوہ میرپورخاص میں شہید محترمہ بینظیر بھٹو گاما اسٹیڈیم اور لاڑکانہ کے کھڑا کمپلیکس میں پاک بھارت میچ براہ راست دکھایا جائے گا۔