باکسنگ ڈے ٹیسٹ کے پہلے روز قومی ٹیم کے بیٹر کامران غلام کی جنوبی افریقی وکٹ کیپر اور کگیسو ربادا سے تلخ کلامی کی ویڈیو وائرل ہوگئی۔
سینچورین میں کھیلے جارہے سیریز کے پہلے ٹیسٹ میچ کے پہلے روز قومی ٹیم محض 211 رنز بناکر آل آؤٹ ہوگئی تھی، پاکستان کی جانب سے کامران غلام نے سب سے زیادہ 54 رنز بنائے تھے۔
میچ کے دوران کامران غلام اور کگیسو ربادا کے درمیان اسوقت تلخ کلامی ہوئی جب سائیڈ اسکرین کے سامنے سے 2 افراد گزر رہے تھے تو بیٹر نے بالر کو رکنے کا اشارہ کیا جس پر ربادا بھڑک اُٹھے اور دونوں کرکٹرز میں تلخ جملوں کا تبادلہ ہوا۔
بعدازاں جنوبی افریقی وکٹ کیپر کائل ویرین اور کامران غلام کے درمیان بھی بحث ہوئی جس پر دونوں نے ایک دوسرے کو کھری کھری سنائیں، بعدازاں کامران غلام وکٹ گنوابیٹھے۔
خیال رہے کہ آسٹریلیا، جنوبی افریقا اور انگلینڈ کے کرکٹرز حریف ٹیموں کو دباؤ میں لانے کیلئے تلخ جملوں کا سہارا لیتے ہیں تاکہ پریشر بڑھا کر وکٹ حاصل کی جاسکے۔