اطالوی اورینٹیئرنگ ایتھلیٹ متیا دیبرٹولیس منگل کے روز چین کے شہر چنگدو میں ورلڈ گیمز کے دوران مقابلے کے دوران گرنے کے بعد انتقال کر گئے، منتظمین کے مطابق 29 سالہ دیبرٹولیس 8 اگست کو اورینٹیئرنگ ایونٹ کے دوران بے ہوش پائے گئے تھے اور چار روز بعد چل بسے۔
خبر رساں ادارے اے ایف پی کے مطابق یہ اعلان ورلڈ گیمز اور انٹرنیشنل اورینٹیئرنگ فیڈریشن (آئی او ایف) کے مشترکہ بیان میں کیا گیا۔
ورلڈ گیمز ہر چار سال بعد منعقد ہونے والا ایک بین الاقوامی ملٹی اسپورٹ ایونٹ ہے، جس میں وہ کھیل شامل ہوتے ہیں جو اولمپکس کا حصہ نہیں ہوتے۔
بیان میں کہا گیا کہ “چین کے ایک بڑے طبی ادارے میں فوری اور ماہر علاج فراہم کیے جانے کے باوجود وہ جانبر نہ ہو سکے”، تاہم موت کی وجہ سے متعلق کوئی تفصیلات نہیں بتائی گئیں۔
اورینٹیئرنگ ایک ایسا کھیل ہے جس میں کھلاڑی نقشہ اور کمپاس کی مدد سے ایک غیر نشاندہ راستے پر مقررہ مقامات تک تیزی سے پہنچتے ہیں اور ہر پوائنٹ پر اپنی موجودگی درج کراتے ہیں۔
یہ ایونٹ چنگدو کے مرکزی علاقے سے تقریباً 50 کلومیٹر دور شدید گرمی اور نمی کے ماحول میں ہوا، جہاں درجہ حرارت 30 ڈگری سینٹی گریڈ سے زائد تھا۔
مشرقی اٹلی کے علاقے پریمیرو سے تعلق رکھنے والے دیبرٹولیس مردوں کے مڈل ڈسٹنس ایونٹ کے فائنل میں حصہ لے رہے تھے جب وہ گر پڑے۔
چھ کلومیٹر طویل اس راستے میں 180 میٹر کا چڑھاؤ اور 20 کنٹرول پوائنٹس شامل تھے جن پر کھلاڑیوں کو لازمی جانا تھا۔
ورلڈ گیمز کے سوشل میڈیا اکاؤنٹس پر جاری فوٹیج میں کھلاڑیوں کو کھیتوں اور دیہات سے گزرتے ہوئے دکھایا گیا۔
سوئٹزرلینڈ کے ریکارڈو رانکان نے یہ کورس 45 منٹ 22 سیکنڈ میں مکمل کر کے طلائی تمغہ جیتا۔
انہوں نے چینی سرکاری میڈیا سے گفتگو میں کہا کہ ’مجھے گرم اور مرطوب حالات کے ساتھ جلد ہم آہنگ ہونا پڑا، اور میرا خیال ہے کہ میں نے یہ کام کافی اچھی طرح کیا‘۔
دیبرٹولیس کا نام آفیشل نتائج میں ’ڈِڈ ناٹ فنش‘ (مکمل نہ کر سکے) کے طور پر درج کیا گیا، ان کے ساتھ مزید 11 کھلاڑی بھی فینش لائن تک نہ پہنچ سکے۔
آئی او ایف کی ویب سائٹ کے مطابق وہ مردوں کی عالمی رینکنگ میں 137 ویں نمبر پر تھے اور 2014 سے مقابلوں میں حصہ لے رہے تھے۔
وہ اطالوی ٹیم کے ساتھ کئی ورلڈ چیمپئن شپ اور ورلڈ کپ ایونٹس میں شریک ہو چکے تھے۔
تربیت کے ساتھ ساتھ دیبرٹولیس اسٹاک ہوم میں قائم کے ٹی ایچ رائل انسٹیٹیوٹ آف ٹیکنالوجی میں پی ایچ ڈی کر رہے تھے جہاں وہ مقیم تھے۔
یہ ورلڈ گیمز کا 12 واں ایڈیشن ہے جو 17 اگست تک جاری رہے گا، جس میں تقریباً 4 ہزار کھلاڑی 253 ایونٹس میں حصہ لے رہے ہیں، مردوں کا مڈل ڈسٹنس اورینٹیئرنگ ایونٹ چنگدو گیمز کا پہلا میڈل ایونٹ تھا۔
مشترکہ بیان میں کہا گیا کہ ورلڈ گیمز اور آئی او ایف اس سانحے سے شدید متاثر ہیں اور ایتھلیٹ کے اہل خانہ، دوستوں اور پوری اورینٹیئرنگ کمیونٹی سے دلی تعزیت کا اظہار کرتے ہیں۔
بیان میں کہا گیا ہے کہ ’ہماری دعائیں ان سب کے ساتھ ہیں جو اس واقعے سے متاثر ہوئے، منتظمین متیا دیبرٹولیس کے اہل خانہ اور اورینٹیئرنگ کمیونٹی کی ہر ممکن مدد جاری رکھیں گے‘۔