میزبان پاکستان نے قذافی اسٹیڈیم لاہور میں کھیلے گئے پہلے ٹیسٹ میں شاندار کارکردگی کا مظاہرہ کرتے ہوئے مہمان جنوبی افریقہ کو 93 رنز سے شکست دے دی۔
پاکستان نے جنوبی افریقہ کو جیت کے لیے 277 رنز کا ہدف دیا تھا، تاہم پروٹیز ٹیم پوری کوشش کے باوجود 183 رنز پر ہی ڈھیر ہوگئی۔ یوں قومی ٹیم نے میچ اپنے نام کر کے تین میچوں کی سیریز میں 0-1 کی برتری حاصل کرلی۔
جنوبی افریقہ کی جانب سے ڈیوالڈ بریوس 54 اور ریان رکلٹن 45 رنز بناکر نمایاں رہے، تاہم دیگر کھلاڑی پاکستانی بولرز کے سامنے زیادہ دیر نہ ٹھہر سکے۔
قومی ٹیم کی جانب سے نعمان علی اور شاہین شاہ آفریدی نے شاندار بولنگ کا مظاہرہ کرتے ہوئے چار، چار وکٹیں حاصل کیں جبکہ ساجد خان نے دو کھلاڑیوں کو آؤٹ کیا۔
نعمان علی نے میچ میں مجموعی طور پر 10 شکار کیے — یہ ان کے ٹیسٹ کیریئر میں تیسری مرتبہ ہے کہ انہوں نے ایک میچ میں 10 یا زائد وکٹیں حاصل کیں۔
قبل ازیں، پاکستان نے پہلی اننگز میں 378 رنز بنائے تھے جس کے جواب میں جنوبی افریقہ کی ٹیم 269 رنز پر آؤٹ ہوئی، یوں قومی ٹیم کو 109 رنز کی برتری ملی۔
دوسری اننگز میں پاکستان کی ٹیم 167 رنز پر سمٹ گئی اور مہمان ٹیم کو 277 رنز کا ہدف دیا، جو وہ حاصل نہ کرسکی۔
پاکستان کی شاندار باؤلنگ
پہلے ٹیسٹ میچ میں پاکستانی بالرز نے شاندار کارکردگی کا مظاہرہ کیا۔ نعمان علی نے مجموعی طور پر 10 کھلاڑیوں کو پویلین کی راہ دکھائی۔ ساجد خان نے 5، شاہین شاہ آفریدی نے 4 اور سلمان علی آغا نے ایک وکٹ حاصل کی۔
پہلی اننگز کی کارکردگی
پاکستان نے پہلے بیٹنگ کرتے ہوئے 378 رنز بنائے، جس کے جواب میں جنوبی افریقہ کی ٹیم 269 رنز پر ڈھیر ہوگئی. جس کے نتیجے میں پاکستان کو 109 رنز کی برتری حاصل ہوئی۔
پاکستان کی جانب سے امام الحق، شان مسعود، محمد رضوان اور سلمان علی آغا نے نصف سنچریاں اسکور کیں۔ جنوبی افریقہ کی جانب سے سینوران متھوسوامی نے 6 وکٹیں حاصل کیں۔
دوسری اننگز
پاکستانی ٹیم نے دوسری اننگز میں 167 رنز بنا کر جنوبی افریقہ کو 277 رنز کا ہدف دیا۔ جنوبی افریقہ کی جانب سے متھوسوامی نے 5 اور سمون ہارمر نے 4 وکٹیں حاصل کیں، جبکہ ایک وکٹ کاگیسو ربادا کے حصے میں آئی۔
چوتھے دن کا کھیل
جنوبی افریقہ نے آج میچ کے چوتھے دن 51 رنز سے اپنی نامکمل اننگز کا آغاز کیا، جس کے بعد مہمان ٹیم پاکستانی بالنگ لائن کا سامنا نہ کرسکی اور 183 رنز پر ڈھیر ہوگئی۔
پاکستان ٹیم کو دو میچوں کی سیریز میں 0-1 کی برتری حاصل ہوگئی ہے۔