ایشیا کپ 2025 میں پاکستان اور بھارت ایک بار پھر آمنے سامنے آنے جا رہے ہیں، دونوں ٹیموں کے درمیان بڑا فائنل اتوار، 28 ستمبر کو دبئی انٹرنیشنل اسٹیڈیم میں کھیلا جائے گا۔ سیاسی کشیدگی کے باوجود شائقین کرکٹ اس ہائی وولٹیج مقابلے کے لیے بےچینی سے منتظر ہیں اور بڑی تعداد میں ٹکٹ خریدنے کے لیے ویب سائٹس کا رخ کر رہے ہیں۔
خلیج ٹائمز کے مطابق فائنل کے ٹکٹوں کی فروخت جاری ہے۔ جمعہ، 26 ستمبر تک پلاٹینم لسٹ ویب سائٹ پر ہائی اسٹینڈ ٹکٹ 350 درہم اور ہاسپیٹیلٹی پاسز 1500 درہم سے دستیاب تھے۔
انتظامیہ نے شائقین کے لیے خصوصی پروموشن اسکیم بھی متعارف کرائی ہے، جس کے تحت تین پریمیم ٹکٹ صرف دو کی قیمت میں حاصل کیے جا سکتے ہیں یعنی ’دو خریدیں، ایک مفت پائیں‘ کی پیشکش۔
اس کا مقصد زیادہ سے زیادہ افراد کو اس تاریخی میچ کا حصہ بنانا ہے۔
ایشیا کپ ایسے وقت میں منعقد ہو رہا ہے جب پاکستان اور بھارت کے تعلقات انتہائی کشیدہ ہیں، اور اس تناؤ کے اثرات کرکٹ میدان میں بھی نظر آئے ہیں۔
ابتدائی دو میچز میں دونوں ٹیموں کے کھلاڑیوں نے میچ کے بعد مصافحہ کرنے سے گریز کیا۔
پہلے میچ میں بھارتی کپتان سوریا کمار یادو پر سیاسی گفتگو کا الزام لگا جبکہ دوسرے میچ میں پاکستانی اوپنر صاحبزادہ فرحان اور فاسٹ بولر حارث رؤف اپنے جارحانہ جشن منانے کے باعث تنقید کی زد میں آگئے۔
ان تمام تنازعات کے باوجود قومی ٹیم کے ہیڈ کوچ مائیک ہیسن نے کھلاڑیوں کو کرکٹ پر توجہ دیں کی تلقین کی ہے۔
موجودہ فارم اور اعداد و شمار کو دیکھا جائے تو بھارت فائنل میں فیورٹ ہے۔ بھارت اس وقت آئی سی سی رینکنگ میں بھی سرفہرست ہے۔ دونوں ٹیموں کے درمیان اب تک کے میچز میں بھارت کا پلڑا بھاری رہا ہے۔
پہلے میچ میں پاکستان نے صرف 127 رنز پر 9 وکٹیں گنوائیں تھیں، جس کا بھارت نے تین وکٹوں کے نقصان پر آسانی سے تعاقب کیا تھا۔
دوسرے میچ میں پاکستان کی کارکردگی بہتر رہی، تاہم وہ پھر بھی چھ وکٹوں سے شکست سے نہ بچ سکا۔
کوچ مائیک ہیسن نے اعتراف کیا کہ بھارت کو ہرانا آسان نہیں ہوگا۔ ان کے بقول ہمیں بھارت کو زیادہ دیر تک دباؤ میں رکھنا ہوگا کیوں کہ وہ دنیا کی نمبر ون ٹیم ہے اور یہی ہمارا اصل چیلنج ہے۔