کراچی: ناروے کپ جیت کر ملک و قوم کا فخر بننے والی پاکستانی ٹیم سندھ اسمبلی پہنچ گئی، جہاں پارلیمانی سیکرٹری اور ایم پی اے لیاری شازیہ کریم سنگھار کے ہمراہ کھلاڑیوں کا پرتپاک اور شاندار استقبال کیا گیا۔
اسپیکر سندھ اسمبلی اویس قادر شاہ، سینیئر وزیر شرجیل انعام میمن، سابق اسپیکر آغا سراج درانی اور اپوزیشن رہنما صابر راجپوت نے فلور آف دی ہاؤس پر کھڑے ہو کر ٹیم کو شاندار الفاظ میں خوش آمدید کہا۔
ارکان اسمبلی نے ان نوجوان کھلاڑیوں کو “قومی ہیروز” قرار دیتے ہوئے کہا کہ انہوں نے پاکستان اور سندھ کا وقار بلند کیا ہے۔
سینیئر وزیر شرجیل میمن نے وزیراعلیٰ سندھ اور اسپورٹس ڈپارٹمنٹ کی جانب سے ان کھلاڑیوں کو انعامات دینے کی یقین دہانی کرائی اور کہا کہ ان کے شایانِ شان انعامات کا باضابطہ اعلان جلد کیا جائے گا۔
اس موقع پر دلچسپ صورتحال اس وقت پیدا ہوئی جب آغا سراج درانی نے ٹرانسپورٹ منسٹر شرجیل میمن کو تجویز دی کہ بچوں کو ریڈ بس کا تحفہ بھی دیا جائے تاکہ انہیں انٹر سٹی میچز میں آمدورفت کی سہولت میسر ہو۔
اس تجویز پر اسمبلی ارکان نے ڈیسک بجا کر بھرپور تائید کی، جس سے ناروے کپ کے فاتح کھلاڑیوں میں خوشی کی لہر دوڑ گئی۔
واضح رہے کہ گزشتہ دنوں پاکستانی ٹیم بیٹر فیوچر پاکستان نے ناروے کپ میں انڈر 15 کا ٹائٹل جیتا تھا۔فائنل میں اس نے ناروے کے کلب یووک لین کو 0-2 سے شکست دی۔
“بیٹر فیوچر پاکستان” کے نام سے میدان میں اُترنے والی لیاری کے باصلاحیت نوجوانوں کی اس جیت نے نہ صرف کھیل کے میدان میں تاریخ رقم کی بلکہ پاکستان کا نام عالمی افق پر فخر سے بلند کیا تھا۔