کویت کے صباح السالم سٹیڈیم میں منگل کو کھیلا گیا ایشین کپ سعودی عرب 2027 کوالیفائرز کا فائنل راؤنڈ میچ پاکستان اور افغانستان کے درمیان 1-1 گول سے برابر رہا۔ تفصیلات کے مطابق، دونوں ٹیموں کے درمیان پچھلے ہفتے اسلام آباد میں کھیلا گیا میچ بھی برابری پر ختم ہوا تھا، تاہم اس میچ میں کوئی گول نہیں ہوا تھا۔
پاکستان اور افغانستان ای گروپ میں شامل ہیں، جہاں شام پہلے ہی گروپ میں اپنی برتری قائم کر چکی ہے، اس لیے یہ میچ دونوں ٹیموں کے لیے اعزاز کی جنگ بن گیا تھا۔
میچ کا آغاز شاندار رہا، اور پانچویں منٹ میں افغانستان کے ڈیفینڈر محبوب حنیفی نے گول کر کے اپنی ٹیم کو برتری دلائی۔
تاہم پاکستان نے حوصلہ برقرار رکھا اور 29ویں منٹ میں عطاس حسین نے اوٹس خان کے شاندار اسسٹ پر گول کر کے میچ کو برابر کر دیا۔
دوسرے ہاف میں پاکستانی کوچ نولبرٹو سولانو نے تین تبدیلیاں کیں جبکہ افغان کوچ وینچنزو اینیزے نے دو کھلاڑی میدان میں اتارے، مگر کوئی بھی نتیجہ تبدیل نہ کر سکا۔
پاکستان اب اپنا اگلا میچ 18 نومبر کو شام کے خلاف کھیلے گا جبکہ افغانستان کا مقابلہ میانمار سے ہوگا۔