پاکستان کرکٹ بورڈ کی سلیکشن کمیٹی نے قومی ٹی ٹوئنٹی ٹیم کے کپتان سلمان علی آغا پر مکمل اعتماد برقرار رکھا ہے، اور امکان ہے کہ وہ جنوبی افریقہ کے خلاف آنے والی سیریز میں گرین شرٹس کی قیادت جاری رکھیں گے۔
ذرائع کے مطابق کپتان سلمان علی آغا اور کوچ مائیک ہیسن کے درمیان جنوبی افریقہ سیریز اور آئی سی سی ٹی 20 ورلڈ کپ کی تیاریوں پر تفصیلی مشاورت ہوئی۔
دونوں اس بات پر متفق ہیں کہ ورلڈ کپ سے قبل قومی ٹیم کے کمبی نیشن کو مزید مضبوط اور متوازن بنایا جائے۔
ذرائع کا کہنا ہے کہ ٹیم مینجمنٹ اور سلیکشن کمیٹی کے درمیان جلد اہم ملاقات متوقع ہے، جس میں کھلاڑیوں کے انتخاب پر غور کیا جائے گا۔
امکان ظاہر کیا جا رہا ہے کہ جنوبی افریقہ کے خلاف ٹیسٹ سیریز کے دوران وائٹ بال ٹیم کا کیمپ لگایا جائے گا، جس کے لیے ممکنہ کھلاڑیوں کے نام جلد منظرِ عام پر آئیں گے۔
ابتدائی اطلاعات کے مطابق پاکستان ٹی 20 اسکواڈ میں سابق کپتان بابر اعظم اور وکٹ کیپر محمد رضوان کی واپسی کے امکانات انتہائی کم ہیں۔
کیونکہ پاکستان ٹی 20 کے کپتان سلمان علی آغا جن کی قیادت کے حوالے سے بورڈ اور ٹیم مینجمنٹ کو کسی قسم کے تحفظات نہیں ہیں وہ جنوبی افریقا کے خلاف سیریز میں نمبر تین پر بیٹنگ کریں گے۔
پاکستان کے لیے 32 ٹی 20 میں 110.21 کے اسٹرائیک ریٹ سے 561 رنز بنانے والے دائیں ہاتھ کے بیٹر نے ایشیا کپ کے 7 میچوں میں صرف 72 رنز بنائے تھے۔
ان کی اس کارکردگی پر کپتان کو تنقید کا سامنا ہے۔ البتہ بورڈ اور ٹیم کے کوچ مائیک ہیسن آئی سی سی ٹی 20 ورلڈ کپ سے قبل کپتانی کی تبدیلی کے لیے تیار نہیں ہیں۔
دوسری جانب یہ اطلاعات بھی ہیں کہ ایشیا کپ کے 7 میچوں میں چار بار صفر پر آؤٹ ہونے والے صائم ایوب جنھیں ٹیسٹ ٹیم سے ڈراپ کردیا گیا ہے۔
وائٹ بال کرکٹ میں ان پر اعتماد برقرار رکھنے کا فیصلہ کیا گیا ہے، جب کہ وکٹ کیپر محمد حارث بھی خطرے میں نہیں ہیں، البتہ فاسٹ بولنگ میں حارث روف کی جگہ دیگر فاسٹ بولرز کو موقع دینے پر اتفاق کیا گیا ہے۔
اطلاعات کے مطابق کوچ مائیک ہیسن اور کپتان سلمان علی آغا پاکستان ٹی 20 اسکواڈ کے ایشیا کپ فائنل میں شکست پرافسردہ ضرور ہیں لیکن وہ اس ٹیم کو تسلسل کے ساتھ موقع دینے کے حق میں ہیں۔
اور اس بات کے امکانات نا ہو نے کے برابر ہیں کہ سابق کپتان بابر اعظم اور وکٹ کیپر محمند رضوان کو جنوبی افریقا کے خلاف ٹی 20 اسکواڈ میں موقع دیا جائے گا۔