سابق آسٹریلوی کرکٹ کپتان اور عالمی شہرت یافتہ بیٹسمین مائیکل کلارک ایک بار پھر جلد کے کینسر میں مبتلا ہو گئے ہیں۔ 43 سالہ کلارک نے سوشل میڈیا پلیٹ فارم “ایکس” (سابقہ ٹوئٹر) پر اپنی صحت سے متعلق اپڈیٹ شیئر کی۔
جس میں انہوں نے ناک سے کینسر زدہ حصے کی سرجری کی تصویر بھی پوسٹ کی اور مداحوں کو جلد کی حفاظت کی اہمیت پر زور دیا۔
کلارک نے خاص طور پر نوجوانوں سے کہا کہ سورج کی مضر شعاعوں سے بچاؤ، جلد کی حفاظت اور باقاعدہ چیک اپ بہت ضروری ہیں۔
کیونکہ وقت پر تشخیص اور احتیاطی تدابیر اختیار کر کے اس بیماری سے بچا جا سکتا ہے۔
انہوں نے لکھا، “جلد کا کینسر ایک حقیقت ہے، خاص طور پر آسٹریلیا جیسے ملک میں۔ آج ناک سے ایک اور حصہ کاٹا گیا۔
یہ ایک دوستانہ یاد دہانی ہے کہ اپنی جلد کا باقاعدہ معائنہ کروائیں۔ احتیاط علاج سے بہتر ہے، اور میرے کیس میں جلد تشخیص اور باقاعدگی سے چیک اپ انتہائی اہم ہیں۔”
کلارک نے اپنے معالج کا بھی شکریہ ادا کیا جنہوں نے بیماری کی ابتدائی سطح پر تشخیص کی۔
مائیکل کلارک کی جلد کے کینسر سے لڑائی نئی نہیں۔ انہیں پہلی بار 2006 میں یہ مرض لاحق ہوا تھا، جبکہ 2019 میں انہوں نے انکشاف کیا تھا کہ ڈاکٹروں نے ان کے چہرے سے تین نان میلانوما زخم ہٹائے تھے۔
اس وقت بھی انہوں نے سورج کی مضر شعاعوں سے بچاؤ کی تلقین کرتے ہوئے کہا تھا، ”ایک اور دن، ایک اور زخم میرے چہرے سے کاٹا گیا… نوجوانوں سے گزارش ہے کہ وہ سورج کی شعاعوں سے خود کو محفوظ رکھنے کے تمام اقدامات کریں۔“
مائیکل کلارک کی نمائندگی میں آسٹریلوی ٹیم نے کئی کامیابیاں حاصل کی ہیں۔ انہوں نے 2004 سے 2015 کے درمیان آسٹریلیا کی نمائندگی کرتے ہوئے 115 ٹیسٹ، 245 ون ڈے اور 34 ٹی ٹوئنٹی میچز کھیلے۔
بطور کپتان 74 ٹیسٹ میچز میں ٹیم کی قیادت کی جن میں 47 فتوحات حاصل کیں اور 139 ون ڈے میچز میں قیادت کی، جن میں 2015 کا ورلڈ کپ اور 2013–14 کی ایشز میں 0-5 کی تاریخی جیت بھی شامل ہے۔
ان کا جارحانہ انداز، قائدانہ صلاحیت اور مشکل لمحات میں استقامت نے انہیں آسٹریلیا کے عظیم ترین کپتانوں کی صف میں کھڑا کیا۔