جنوبی افریقا نے آسٹریلیا کے خلاف سیریز کے تیسرے اور آخری ون ڈے میں دردناک شکست کے بعد اپنی ون ڈے کرکٹ کی تاریخ کا بدترین ریکارڈ بنا ڈالا۔
اتوار کو آسٹریلیا نے مہمان ٹیم جنوبی افریقا کو سیریز کے آخری ون ڈے میں 276 رنز کے بڑے مارجن سے شکست دی، تاہم 3 میچوں پر مشتمل سیریز 1-2 سے جنوبی افریقی ٹیم کے نام رہی۔
میک کے میں کھیلے گئے سیریز کے آخری میچ میں آسٹریلیا نے پہلے بیٹنگ کرتے ہوئے 2 وکٹ پر 431 رنز کا پہاڑ کھڑا کیا۔
آسٹریلیا کے ابتدائی تین بیٹرز نے شاندار سنچریاں اسکور کیں۔ اوپنر ٹریوس ہیڈ اور مچل مارش نے پہلی وکٹ کی شراکت میں 250 رنز جوڑے۔
ٹریوس ہیڈ نے 103 گیندوں پر 142 رنز اسکور کیے، جبکہ مچل مارش نے 106 گیندوں پر سنچری بنائی۔
کینگروز کی جانب سے سب سے جارحانہ بیٹنگ کیمرون گرین نے کی، جنہوں نے صرف 55 گیندوں پر 6 چوکوں اور 8 چھکوں کی مدد سے ناقابل شکست 118 رنز اسکور کیے۔
اس کے علاوہ ایلکس کیری نے 50 رنز پر ناٹ آؤٹ رہتے ہوئے گرین کے ساتھ 164 رنز کی شراکت قائم کی۔
432 رنز کے ہدف کے جواب میں جنوبی افریقا کے بیٹرز آسٹریلوی بولر کوپر کونولی کے سامنے بے بس رہے اور پوری ٹیم صرف 155 رنز پر آؤٹ ہو گئی۔
جس سے مہمان ٹیم کو 276 رنز کے بڑے مارجن سے شکست کا سامنا کرنا پڑا۔
آسٹریلیا کی جانب سے کوپر نے صرف 22 رنز دے کر 5 وکٹیں حاصل کیں، جبکہ شان ایبٹ اور زیویئر بارٹلیٹ نے 2، 2 وکٹیں حاصل کیں۔
اس شکست کے ساتھ ہی جنوبی افریقا نے اپنی ون ڈے کرکٹ کی تاریخ کا بدترین ریکارڈ بنا ڈالا۔
276 رنز سے شکست جنوبی افریقا کی رنز کے اعتبار سے اپنی ون ڈے کی تاریخ کی سب سے بڑی شکست ہے۔
اس سے قبل جنوبی افریقا کو 2023 میں بھارت کے خلاف 243 رنز سے شکست کا سامنا کرنا پڑا تھا۔
واضح رہے کہ شکست کے باوجود سیریز 1-2 سے جنوبی افریقا کے نام رہی جو ابتدائی 2 ون ڈے میچز میں کامیاب رہا تھا۔