پاکستان کرکٹ بورڈ نے دورۂ بنگلا دیش کے لیے 15 رکنی اسکواڈ کا اعلان کر دیا ہے، جہاں قومی ٹیم 20 سے 24 جولائی تک ڈھاکا میں میزبان ٹیم کے خلاف تین ٹی ٹوئنٹی میچز کھیلے گی۔
سیریز کے لیے سلمان علی آغا کو کپتان برقرار رکھا گیا ہے، جبکہ کسی نائب کپتان کا تقرر نہیں کیا گیا۔
اسکواڈ میں تجربہ کار اور نوجوان کھلاڑیوں کا متوازن امتزاج شامل کیا گیا ہے۔
وکٹ کیپنگ کے فرائض کے لیے محمد حارث اور صاحبزادہ فرحان کو منتخب کیا گیا ہے۔
پاکستانی ٹیم کا یہ دورہ نوجوان کھلاڑیوں کو بین الاقوامی تجربہ فراہم کرنے اور مستقبل کے اہم ایونٹس کی تیاری کے حوالے سے اہم تصور کیا جا رہا ہے۔
پاکستان کرکٹ ٹیم 16 جولائی کو بنگلا دیش پہنچے گی جہاں دونوں ٹیموں کے مابین ٹی 20 سیریز کا آغاز 20 جولائی سے ہوگا۔
شیڈول کے مطابق پہلا ٹی ٹوئنٹی میچ 20 جولائی کو ڈھاکا میں کھیلا جائے گا، دوسرا میچ 22 جولائی جبکہ تیسرا میچ 24 جولائی کو شیڈول ہے۔
دورہ بنگلا دیش اور ویسٹ انڈیز کے لیے پاکستان کرکٹ اسکواڈ کا تربیتی کیمپ بدھ سے شروع ہوگا، نیشنل بنک اسٹیڈیم میں منعقد ہونے والے کیمپ کے لیے ممکنہ کھلاڑی آج (منگل) کو رپورٹ کریں گے۔
تربیتی کیمپ 15 جولائی تک جاری رہے گا، پاکستان کرکٹ ٹیم اگلے روز 16جولائی کو ڈھاکہ پہنچے گی، دورہ بنگلا دیش کے بعد پاکستان ٹیم امریکہ کیلئے روانہ ہوگی۔
پاکستان اور ویسٹ انڈیز کے درمیان 3 میچز پر مشتمل ٹی 20 سیریز فلوریڈا میں یکم تا 4 اگست کھیلی جائے گی، بعدازاں دونوں ممالک کے درمیان ون ڈے سیریز 8 سے 12 اگست تک ٹرینیڈاڈ اینڈ ٹوباگو میں منعقد ہوگی۔
پاکستان اسکواڈ برائے بنگلہ دیش سیریز:
سلمان علی آغا (کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز، صاحبزادہ فرحان (وکٹ کیپر)، صائم ایوب، سلمان مرزا اور سفیان مقیم۔