انٹرنیشنل کرکٹ کونسل ( آئی سی سی) نے ٹی 20 انٹرنیشنل کی تازہ ترین رینکنگ جاری کر دی ہے، جس میں پاکستانی نوجوان کھلاڑیوں نے شاندار ترقی حاصل کی ہے۔
بنگلہ دیش کے خلاف حالیہ تین میچوں کی سیریز میں عمدہ کارکردگی دکھانے والے صاحبزادہ فرحان نے بیٹرز کی فہرست میں 69 درجے ترقی کرتے ہوئے پہلی بار ٹاپ 100 میں جگہ بنا لی، اور اب وہ 97 ویں نمبر پر پہنچ گئے ہیں۔ ان کے رینکنگ پوائنٹس 389 ہیں۔
دوسری جانب مڈل آرڈر بیٹر حسن نواز بھی 14 درجے بہتری کے ساتھ 500 پوائنٹس پر پہنچ گئے ہیں اور جنوبی افریقی بیٹر ڈیوڈ ملر کے ساتھ 54ویں پوزیشن پر آ گئے ہیں۔
قومی ٹی 20 ٹیم کے کپتان آغا سلمان نے بھی دو درجے ترقی کی اور اب وہ 91 ویں نمبر پر ہیں۔ اوپنر صائم ایوب بھی دو درجے بہتری کے بعد 62ویں پوزیشن پر پہنچ گئے ہیں۔
تاہم کچھ تجربہ کار کھلاڑیوں کی رینکنگ میں تنزلی ہوئی ہے۔ بابر اعظم اب 14 ویں جبکہ محمد رضوان 16 ویں نمبر پر ہیں۔ محمد حارث کو سب سے بڑا نقصان ہوا ہے، ان کی رینکنگ 15 درجے گر کر 65 پر آ گئی ہے، جبکہ فخر زمان اب 81 ویں نمبر پر موجود ہیں۔
بیٹنگ رینکنگ میں بھارت کے ابھیشیک شرما نے آسٹریلیا کے ٹریوس ہیڈ کو پیچھے چھوڑ کر پہلی پوزیشن حاصل کر لی ہے، جبکہ تیلاک ورما تیسرے نمبر پر ہیں۔
بولنگ کے شعبے میں کوئی بھی پاکستانی کھلاڑی ٹاپ 20 میں شامل نہیں۔ فاسٹ بولر عباس آفریدی اور حارث رؤف دو، دو درجے تنزلی کے بعد بالترتیب 24ویں اور 26ویں پوزیشن پر چلے گئے ہیں۔ شاہین شاہ آفریدی نے ایک درجہ بہتری کے ساتھ 35 ویں پوزیشن حاصل کی۔
اسپنر ابرار احمد کی رینکنگ دو درجے گر کر 51 ہو گئی ہے، اور شاداب خان 67 ویں نمبر پر آ گئے ہیں۔
ٹی 20 بولنگ رینکنگ میں نیوزی لینڈ کے جیکب ڈفی بدستور پہلے، انگلینڈ کے عادل رشید دوسرے اور بھارت کے ورون چکرورتی تیسرے نمبر پر ہیں۔