بھارتی کرکٹرز کے پاکستانی ٹیم سے ہاتھ نہ ملانے کے معاملے پر عالمی سطح پر بحث جاری ہے، اسی دوران آسٹریلوی کھلاڑیوں نے بھارتی ٹیم کے اس رویے کو ہنسی مذاق کا نشانہ بنا ڈالا۔
ایشیا کپ 2025 کے گروپ میچ کے بعد بھارتی کپتان سوریا کمار یادو کی جانب سے پاکستانی کپتان سلمان علی آغا سے ہاتھ نہ ملانے کا واقعہ منظرعام پر آیا تھا، جس کے بعد باقی بھارتی کھلاڑیوں نے بھی یہی طرزِ عمل اپنایا۔
اطلاعات کے مطابق یہ فیصلہ پہلگام حملوں کے بعد بھارت اور پاکستان کے درمیان بڑھتی سیاسی کشیدگی کے باعث کیا گیا، تاہم آسٹریلوی کرکٹرز نے اسے مزاحیہ انداز میں پیش کرتے ہوئے ایک طنزیہ ویڈیو جاری کردی۔
کایو اسپورٹس کے پلیٹ فارم پر جاری اس ویڈیو میں اینکرز نے بھارتی ٹیم کے “نہ ملنے والے ہاتھوں” پر طنز کرتے ہوئے کہا، “بھارت ایک بہترین ٹیم ہے، مگر ہم نے ان کی ایک کمزوری ڈھونڈ نکالی ہے وہ روایتی ہینڈ شیک پسند نہیں کرتے!”
ویڈیو میں آسٹریلوی کھلاڑی مختلف غیر روایتی انداز میں سلام کرنے کی مشق کرتے دکھائی دیے، جیسے ایئر ہائی فائیو، سر جھکا کر سلام، اور فوجی طرز کی سلامی۔
جہاں بھارتی شائقین نے اس ویڈیو کو “غیر حساس” قرار دیا، وہیں کئی غیر ملکی مداحوں نے اسے کرکٹ کے مزاحیہ پہلو کے طور پر سراہا۔
واضح رہے کہ ایشیا کپ کے دوران پیش آنے والا یہ واقعہ سیاسی تناؤ کے پس منظر میں ایک نیا کرکٹ تنازع بن چکا ہے۔
دوسری جانب آسٹریلیا کے ٹیسٹ کپتان پیٹ کمنز کی فٹنس ایک بڑا سوال بنی ہوئی ہے۔ تازہ اسکین رپورٹس کے مطابق ان کی کمر کی انجری مکمل طور پر ٹھیک نہیں ہوئی، جس کے باعث وہ ممکنہ طور پر 21 نومبر سے شروع ہونے والی ایشز سیریز کا پہلا ٹیسٹ نہیں کھیل سکیں گے۔
کمنز نے خود اعتراف کیا، ’میں کوئی حتمی رائے نہیں بتانا چاہوں گا، لیکن لگتا ہے واپسی کے امکانات کم ہیں۔ ابھی کچھ وقت باقی ہے، دیکھتے ہیں کیا ہوتا ہے۔‘