بھارتی بلے باز سوریا کمار یادیو کا کہنا ہے کہ اب بھارت اور پاکستان کے درمیان ہونے والے میچ کو روایتی “رائیولری” کہنا درست نہیں ہوگا۔ ایشیا کپ سپر فور میں پاکستان کو شکست دینے کے بعد گفتگو کرتے ہوئے انہوں نے کہا کہ اگر دو ٹیمیں 15 سے 20 میچ کھیلیں اور نتائج تقریباً برابر ہوں تو اسے رائیولری کہا جا سکتا ہے۔
لیکن جب ایک ٹیم مسلسل جیت رہی ہو تو یہ مقابلہ حریفانہ نہیں رہتا۔
انہوں نے وضاحت کرتے ہوئے کہا: “میرے خیال میں اگر اسکور 7-7 یا 8-7 ہو تو رائیولری بنتی ہے، لیکن اگر حساب 13-0 یا 10-1 ہو تو یہ رائیولری نہیں کہی جا سکتی۔ ہم نے ان کے مقابلے میں بہتر کرکٹ کھیلی ہے۔”
خیال رہے کہ گزشتہ روز ایشیا کپ سپر فور میچ میں بھارت نے پاکستان کو ٹی 20 انٹرنیشنل کرکٹ میں مسلسل آٹھویں بار شکست دی۔ پاکستان نے آخری مرتبہ بھارت کو ایشیا کپ 2022 میں دبئی میں ہرایا تھا۔
سوریا کمار نے میچ کے ٹرننگ پوائنٹ پر بات کرتے ہوئے کہا کہ پہلی اننگز میں جب پاکستان 10 اوورز کے بعد 91 رنز پر ایک آؤٹ تھا تو کھیل کا توازن بدل گیا۔
ڈرنکس بریک کے بعد بھارتی گیند بازوں نے لائن اور لینتھ میں تبدیلی کی، زیادہ توانائی دکھائی اور پاکستانی بلے بازوں کو کھل کر کھیلنے کا موقع نہیں دیا۔
اگلے سات اوورز میں پاکستان صرف 38 رنز ہی بنا سکا جو اس ٹورنامنٹ کے دوران 10 سے 17 اوورز میں کسی بھی ٹیم کا سب سے کم اسکور ہے۔
انہوں نے خاص طور پر شیوَم دوبے کی تعریف کی جنہوں نے پہلی بار اپنے چار اوور مکمل کیے اور دو اہم وکٹیں حاصل کیں۔
جن میں صائم ایوب اور صاحبزادہ فرحان شامل تھے۔ دوبے کی شاندار بولنگ نے میچ کا نقشہ بدل دیا۔