لاہور: پنجاب بھر میں گندم کو مرغیوں کے دانے میں استعمال کرنے پر پابندی عائد کر دی گئی۔
محکمہ داخلہ پنجاب نے صوبہ بھر کی فیڈ ملز میں گندم کو مرغیوں کے دانے میں استعمال کرنے پر پابندی عائد کرتے ہوئے دفعہ 144 نافذ کر دی۔ اعلامیہ کے مطابق یہ فیصلہ گندم، آٹے اور روٹی کی بلا تعطل فراہمی یقینی بنانے کے لیے کیا گیا ہے۔
سیکرٹری داخلہ پنجاب کے جاری کردہ حکمنامے کے مطابق گندم صرف فلور ملز میں آٹا بنانے کے لیے استعمال کی جائے گی۔ جبکہ فیڈ ملز پر 30 یوم تک گندم کے استعمال پر پابندی عائد رہے گی۔ اور پابندی کا اطلاق 2 نومبر تک ہو گا۔
محکمہ داخلہ کے ترجمان کے مطابق صوبے میں فیڈ ملز کے پاس ایک لاکھ میٹرک ٹن سے زائد گندم کا ذخیرہ موجود ہے۔ اور یہ ذخیرہ مرغیوں کے دانے کے طور پر استعمال ہونے والا تھا۔
سیکرٹری پرائس کنٹرول کی رپورٹ کے مطابق یہ اقدام گندم کی ممکنہ قلت سے بچاؤ کے لیے ناگزیر قرار دیا گیا۔
اعلان میں کہا گیا کہ گندم انسانوں کی بنیادی خوراک ہے۔ اور اسے صرف آٹے کی تیاری میں استعمال ہونا چاہیے۔
دوسری جانب گندم کے شارٹ فال کے خدشے کے باعث وفاقی حکومت نے پنجاب حکومت کو خط لکھ دیا۔ اور پنجاب حکومت سے گندم کے اسٹاک کی تفصیلات مانگ لیں۔
یہ بھی پڑھیں: خیبرپختونخوا کابینہ نے 9 مئی کا آخری کیس بھی واپس لینے کی منظوری دے دی
وفاقی وزارت غذائی تحفظ نے گندم شارٹ فال کا حل تلاش کرنا شروع کر دیا۔ اور صوبوں سے بات چیت میں مختلف آپشنز پر غور جاری ہے۔ وفاقی حکومت نے گندم درآمد کرنے پر بھی غور شروع کر دیا۔