ایشیائی ترقیاتی بینک نے پاکستان کی معیشت کے حوالے سے جائزہ رپورٹ جاری کر دی ہے۔
ایشیائی ترقیاتی بینک کا کہنا ہے کہ پاکستان کی معیشت میں 2025 میں بہتری کے اثرات سے ترقی میں اضافہ ہوا ہے ، معیشت درمیانی مدت میں ترقی کی راہ پر گامزن ہے۔
رپورٹ کے مطابق پاکستان میں مالی سال 2026 میں جی ڈی پی گروتھ 3 فیصد رہنے کا امکان ہے، پالیسی ریفارمز اور استحکام سے معیشت میں بہتری جاری رہے گی، آئی ایم ایف پروگرام کے تحت پاکستان میں معاشی اصلاحات میں پیشرفت ہوئی۔
وزیراعظم سے نیویارک میں صدر عالمی بینک کی ملاقات، اہم امور پر تبادلہ خیال
ایشیائی بینک کے کنٹری ڈائریکٹر نے بتایا کہ پاکستان کی ترقی کے امکانات مثبت ہیں لیکن ڈھانچہ جاتی چیلنجز برقرار ہیں، بار بار آنے والی قدرتی آفات اور حالیہ سیلاب ترقی کیلئے خطرہ ہیں۔
اے ڈی بی کے مطابق اصلاحات اور پالیسی عملدرآمد سے معاشی رفتار اور اعتماد برقرار رکھا جا سکتا ہے، 2026 میں امریکہ پاکستان تجارتی معاہدے سے کاروباری اعتماد بحال ہونے کا امکان ہے۔
رپورٹ میں بتایا گیا کہ بیرونی زرمبادلہ کے ذخائر میں بہتری اور سرمایہ کاری میں اضافہ متوقع ہے، سیلاب سے انفراسٹرکچر اور زرعی اراضی کو نقصان شرح نمو پر دباؤ ڈالے گا، تعمیراتی شعبے کیلئے بجٹ میں دی گئی مراعات جزوی طور پر نقصانات کم کریں گی۔
ایشیائی بینک کا پاکستان کیلئے 33 کروڑ ڈالر کی اضافی امداد کا اعلان
رپورٹ کے مطابق 2026 میں اوسطاً مہنگائی 6 فیصد تک بڑھنے کا امکان ہے، سیلاب سے سپلائی چین متاثر ہوگی جس سے خوراک کی قیمتوں میں اضافہ متوقع ہے، گیس ٹیرف بڑھنے سے بھی مہنگائی بڑھے گی، مرکزی بینک مہنگائی کنٹرول کرنے کیلئے محتاط مانیٹری پالیسی اپنائے گا۔