ڈاکٹر عافیہ صدیقی کی رہائی اور وطن واپسی سے متعلق کیس میں اہم پیش رفت سامنے آئی ہے۔
اسلام آباد ہائی کورٹ نے کیس کو لارجر بینچ کے سامنے سماعت کے لیے مقرر کر دیا ہے۔
رجسٹرار آفس کی جانب سے جاری کردہ کاز لسٹ کے مطابق کیس کی سماعت 29 اکتوبر کو ہو گی۔
عدالت عالیہ نے اس معاملے پر چار رکنی لارجر بینچ تشکیل دے رکھا ہے جس کی سربراہی جسٹس ارباب محمد طاہر کریں گے، جبکہ جسٹس خادم حسین سومرو، جسٹس اعظم خان اور جسٹس راجہ انعام امین منہاس بینچ میں شامل ہیں۔
عافیہ صدیقی کیس پر گزشتہ سماعت بینچ کے ایک رکن کی عدم دستیابی کے باعث منسوخ کر دی گئی تھی۔ بعد ازاں یکم ستمبر کو جسٹس انعام امین منہاس نے فائل چیف جسٹس کو بھجوا کر کیس لارجر بینچ کے سپرد کرنے کی سفارش کی تھی۔
یہ کیس اس سے قبل جسٹس سردار اعجاز اسحاق خان کی عدالت میں زیرِ سماعت تھا۔ جسٹس اعجاز اسحاق نے گزشتہ سماعت کے دوران وزیراعظم اور کابینہ کے ارکان کو توہینِ عدالت کے نوٹس جاری کیے تھے۔
بعد ازاں جسٹس اعجاز اسحاق کے ٹیکس کیسز کے لیے اسپیشل ڈویژن بینچ میں شامل کیے جانے کے بعد ان کے زیرِ سماعت سنگل بینچ مقدمات دیگر ججوں کو منتقل کر دیے گئے تھے۔
ذرائع کا کہنا ہے کہ عافیہ صدیقی کی رہائی اور وطن واپسی سے متعلق کیس کو اہم نوعیت کا قرار دیا جا رہا ہے، اور آئندہ سماعت میں متعلقہ حکومتی اداروں سے رپورٹ طلب کیے جانے کا امکان ہے۔