پارلیمنٹ سے 27ویں آئینی ترمیم کی منظوری کے معاملے پر سیاسی سرگرمیاں تیز ہو گئیں ہیں۔
ذرائع کے مطابق وزیراعظم شہباز شریف نے ترمیم پر تمام سیاسی جماعتوں کا اتفاقِ رائے حاصل کرنے کے لیے اسپیکر قومی اسمبلی سردار ایاز صادق کو اہم ٹاسک سونپ دیا ہے۔
ذرائع نے مزید بتایا ہے کہ اسپیکر قومی اسمبلی نے تمام پارلیمانی رہنماؤں کا اجلاس آج شام 4 بجے پارلیمنٹ ہاؤس کے اسپیکر لاونج میں طلب کر لیا ہے۔
اجلاس میں تحریکِ انصاف اور جمعیت علمائے اسلام (ف) سمیت تمام بڑی جماعتوں کے پارلیمانی لیڈرز اور اتحادی جماعتوں کے چیف وہپس کو بھی شرکت کی دعوت دی گئی ہے۔
اجلاس میں آئینی ترمیم کے خدو خال پر بریفنگ دی جائے گی اور منظوری سے متعلق حکومتی حکمتِ عملی طے کی جائے گی۔
اسپیکر سردار ایاز صادق اجلاس کے دوران تمام جماعتوں سے ترمیم کی حمایت کی درخواست کریں گے، جب کہ وہ پارلیمانی رہنماؤں سے اپنے چیمبر میں الگ الگ ملاقاتیں بھی کریں گے۔
ذرائع کے مطابق اگر ترمیم پر اتفاقِ رائے نہ ہو سکا تو حکومت اپنی نمبرز گیم پر انحصار کرے گی۔
اس سلسلے میں ذرائع نے دعویٰ کیا ہے کہ مسلم لیگ (ن) نے اپنے اور اتحادی جماعتوں کے تمام اراکینِ قومی اسمبلی کو فوری طور پر اسلام آباد پہنچنے کی ہدایت جاری کر دی ہے۔
پارلیمانی ذرائع کا کہنا ہے کہ حکمراں اتحاد کو قومی اسمبلی میں آئینی ترمیم کی منظوری کے لیے درکار 224 اراکین کی حمایت حاصل ہے۔