کراچی: گورنر سندھ کامران ٹیسوری نے لیاری حادثے میں جاں بحق افراد کے لواحقین کو 80، 80 گز کے پلاٹ اور بے گھر خاندانوں کو راشن فراہم کرنے کا اعلان کر دیا۔
گورنر سندھ کامران خان ٹیسوری نے میڈیا سے گفتگو کرتے ہوئے کہا کہ سندھ حکومت نے گزشتہ 20 سال میں کسی رہائشی منصوبے میں ترقیاتی کام مکمل نہیں کیا۔
انہوں نے کہا کہ سرکاری رہائشی اسکیموں میں تاخیر کی وجہ سے شہری پورشن لینے پر مجبور ہوتے ہیں۔ اسکیم 42 تیسر ٹاؤن میں 20 سال سے ترقیاتی کام نہیں ہوئے۔
یہ بھی پڑھیں: ہمیشہ بات چیت کا دروازہ کھلا رکھنا چاہیے، بیرسٹر گوہر
کامران ٹیسوری نے کہا کہ ڈی جی سندھ بلڈنگ کنٹرول اتھارٹی (ایس بی سی اے) کو معطل کیا گیا ہے۔ لیکن چہرے بدلنے سے نظام ٹھیک نہیں ہو گا۔ ایس بی سی اے کا سسٹم تبدیل کریں اور یہاں کوئی سیاسی تکرار نہیں کرنی۔ یہ ہم سب کا شہر ہے۔
انہوں نے کہا کہ لیاری کے عوام کو مایوس نہیں کروں گا۔ اور متاثرین گورنر ہاؤس میں خود کو رجسٹر کرائیں۔ اس حوالے سے ایوان میں آواز اٹھاؤں گا۔ تاہم عمارت گرنے کے واقعے پر وزیر اعلیٰ سندھ کا کمیٹی بنانا خوش آئند ہے۔ اس کے فیصلے کو ہم دیکھیں گے۔
گورنر سندھ نے کہا کہ سندھ حکومت 6 مہینے کا کرایہ اور اسی علاقے میں متاثرین کو گھر لے کر دے۔ جو خاندان بے گھر ہوئے ہیں انہیں راشن فراہم کریں گے۔