وزارت داخلہ نے پی او آر کارڈ ہولڈرز افغان شہریوں کی وطن واپسی کے حوالے سے نوٹیفکیشن جاری کردیا ہے جس کے مطابق پی او آر کارڈ ہولڈرز کی رضاکارانہ واپسی کا عمل فوری طور پرشروع کیا جائے گا۔
نوٹیفکیشن میں کہا گیا ہے کہ باقی ماندہ پی او آر ہولڈر افغان شہریوں کی واپسی کا عمل یکم ستمبر سے شروع ہو گا،یہ فیصلہ سیکیورٹی خدشات اور وسائل پر بڑھتے دباؤ کو مدنظر رکھتے ہوئے اجلاس میں کیا گیا۔
واپسی کا عمل آئی ایف آر پی کے پہلے سے جاری فیصلے کے مطابق برقرار رکھا جائے گا ،مہاجرین کی واپسی میں وزارت خارجہ افغان حکومت اور دیگر اداروں کیساتھ تعاون کریگی۔
وزارت امور کشمیر، گلگت بلتستان و سیفران پی او آر ہولڈرز کا ڈیٹا متعلقہ صوبائی و ضلعی کمیٹیوں کو فراہم کریگی
نادرا واپس جانے والوں کی رجسٹریشن ختم کرنے کے انتظامات کرے گا۔
ایف آئی اے نامزد بارڈر کراسنگ پوائنٹس پر وطن واپسی کے عمل کو سہولت فراہم کریگی، نوٹیفکیشن کے مطابق تمام صوبائی حکومتوں اور متعلقہ ایجنسیوں کو کہا گیا ہے کہ وہ پی او آرہولڈرز کی مکمل میپنگ کریں۔
وطن واپسی کیلئےصوبائی ایکشن پلان تشکیل دیکر وزارت داخلہ سے شیئر کیا جائے،جلاوطن افراد کیلئےٹرانزٹ ایریاز کا تعین اور نقل و حمل و مالی معاونت کا بندوبست کیا جائے۔
شکایات کے ازالے کے لیے ہاٹ لائن اور شکایتی سیل قائم کیا جائے گا،وطن واپسی کی روزانہ پیشرفت کی نگرانی فارن نیشنل سیکیورٹی ڈیش بورڈ کرے گا،رابطہ کاری کیلئے وزارت داخلہ نے سیکشن آفیسر سیکیورٹی کو فوکل پرسن مقرر کردیا ہے۔