محکمہ داخلہ پنجاب نے شدید سیلابی صورتحال کے پیشِ نظر صوبے کے سات اضلاع میں فوج کی تعیناتی کے لیے وفاقی وزارت داخلہ کو باضابطہ مراسلہ بھیج دیا ہے۔
سیلابی خطرات کے پیشِ نظرلاہور، قصور، سیالکوٹ، سرگودھا، فیصل آباد، نارووال اور اوکاڑہ میں فوج کو طلب کر لیا گیا ہے تاکہ سول انتظامیہ کو معاونت فراہم کی جا سکے۔
سیلابی صورتحال، حکومت نے اگلے 12 گھنٹے انتہائی اہم قرار دے دیئے
محکمہ داخلہ کے مطابق یہ فیصلہ متاثرہ علاقوں میں انسانی جانوں کے تحفظ، بروقت امدادی کارروائیوں اورممکنہ انخلا کو یقینی بنانے کیلئے کیا گیا ہے ضلعی انتظامیہ ریسکیو 1122، سول ڈیفنس اور پولیس پہلے ہی الرٹ اور متحرک ہیں۔
مراسلے میں یہ بھی کہا گیا ہے کہ چھ اضلاع میں فوجی دستوں کی تعداد ضلعی انتظامیہ کی مشاورت سے طے کی جائے گی جبکہ ضرورت کے مطابق آرمی ایوی ایشن، کشتیوں اوردیگروسائل کی فراہمی بھی ممکن بنائی جائیگی۔
متاثرہ علاقوں میں ریسکیو آپریشنز کو مؤثر بنانے کے لئے سول و فوجی ادارے مل کر کام کریں گے، حکومت نے عوام سے بھی اپیل کی ہے کہ وہ ہدایات پرعمل کریں اورامدادی اداروں کیساتھ مکمل تعاون کریں۔