اسلام آباد: وزیر اعظم شہباز شریف نے کہا ہے کہ پاکستان کی معیشت مستحکم ہو چکی ہے۔ اور ملک ترقی و خوشحالی کے سفر پر گامزن ہے۔
وزیر اعظم شہباز شریف نے جناح اسکوائر مری روڈ انڈر پاس کے سنگ بنیاد کی تقریب سے خطاب کرتے ہوئے کہا کہ اسلام آباد میں توسیع و تزئین کے وسیع و عریض منصوبے جاری ہیں۔ جن کی بدولت اسلام آباد میں ٹریفک کے بہاؤ میں بہتری آچکی ہے۔ بہترین اقدامات کے لیے محسن نقوی مبارکباد کے مستحق ہیں۔
انہوں نے کہا کہ اسلام آباد میں پھول دارالحکومت کے حسن کو دوبالا کر رہے ہیں۔ اور اسلام آباد کے حسن کے لیے جو کاوشیں کر رہے ہیں وہ قابل ستائش ہیں۔ اسلام آباد خوبصورتی کا گہوارہ بنے گا۔
شہباز شریف نے کہا کہ اجتماعی کاوشوں سے پاکستان کا نام بلند ہو گا۔ اور پچھلے ایک سال میں پاکستان کی معاشی ریٹنگ بہتر ہوئی ہے جبکہ عالمی ریٹنگ ایجنسی فچ نے بھی پاکستان کی معیشت کو مستحکم قرار دیا ہے۔
انہوں نے کہا کہ پاکستان کی معیشت مستحکم ہوچکی ہے۔ اور ملک ترقی و خوشحالی کے سفر پر گامزن ہے۔
یہ بھی پڑھیں: پاکستان اور ہنگری کے درمیان ڈپلومیٹک پاسپورٹ ویزا مفت کرنے کا معاہدہ ہوا، اسحاق ڈار
بلوچستان سے متعلق گفتگو کرتے ہوئے وزیر اعظم نے کہا کہ بلوچستان کے عوام کو تحفہ دیا ہے۔ بلوچستان کا روڈ 2 ہزار کے قریب جانیں نگل چکا ہے۔ لیکن اب ہم بلوچستان کے خونی ٹریک کو ہائی وے بنانے جا رہے ہیں۔
انہوں نے کہا کہ این ایف سی میں بلوچستان کا کوٹہ ڈبل کر دیا گیا ہے۔ اور بلوچستان کے عوام کو ایسا منصوبہ دینا چاہیے تھا جو تمام اقوام کی دل کی آواز ہو۔