لاہور: وزیر اعلیٰ پنجاب مریم نواز نے کہا ہے کہ جدید ٹیکنالوجی سے روایتی تعلیم کو زیادہ مؤثر اور دلچسپ بنایا جا رہا ہے۔
وزیر اعلیٰ پنجاب مریم نواز نے ڈیجیٹل لرننگ ڈے پر اپنے پیغام میں کہا کہ ڈیجیٹل لرننگ دور میں ترقی ٹیکنالوجی اور جدید تعلیم سے مشروط ہے۔ جبکہ پنجاب کے نوجوانوں کو جدید دنیا کے تقاضوں سے ہم آہنگ کر رہے ہیں۔
انہوں نے کہا کہ سی ایم لیپ ٹاپ اسکیم پنجاب کے طلبا کے لیے انقلابی قدم ثابت ہو گا۔ اور پنجاب میں نوجوانوں کو آئی ٹی ٹریننگ پروگرامز کرائے جا رہے ہیں۔
یہ بھی پڑھیں: ملک میں سولر پینلز کی قیمتوں میں بڑی کمی ہو گئی
مریم نواز نے کہا کہ نوجوانوں کو اے آئی اور سافٹ ویئر ڈیولپمنٹ کے کورسز بھی کرائے جا رہے ہیں۔ جبکہ آئی ٹی کورسز سے فری لانسرز مستفید ہو رہے ہیں۔ سرکاری اسکولوں میں اسمارٹ کلاس رومز اور ڈیجیٹل لیب بنا رہے ہیں۔
انہوں نے کہا کہ جدید ٹیکنالوجی سے روایتی تعلیم کو زیادہ مؤثر اور دلچسپ بنایا جا رہا ہے۔ اور لاہور میں نواز شریف آئی ٹی سٹی بھی بنا رہے ہیں۔ آئی ٹی سٹی میں ٹوئین ٹاور اسی سال مکمل کر لیے جائیں گے۔
وزیر اعلیٰ پنجاب نے کہا کہ نواز شریف آئی ٹی سٹی میں پلگ اینڈ پلے کال سینٹر ہب بھی قائم ہو گا۔ اور آئی ٹی سٹی میں نوجوانوں کو روزگار کے مواقع ملیں گے۔ عالمی سطح کی آئی ٹی یونیورسٹیاں کیمپس قائم کرنے میں دلچسپی ظاہر کر رہی ہیں۔