اسلام آباد: وزیر اعظم شہباز شریف نے بارشوں کے 2 نئے سلسلوں کے پیش نظر امدادی سرگرمیاں تیز کرنے کی ہدایت کر دی۔
وزیر اعظم شہباز شریف نے غذر میں گلوف کے باعث سیلابی صورتحال بننے پر خصوصی احکامات جاری کر دیئے۔ اور رہائشیوں کو محفوظ مقامات پر منتقل کرنے پر ریسکیو ٹیموں اور مقامی رضاکاروں کی پذیرائی کی۔
شہباز شریف نے نیشنل ڈیزاسٹر مینجمنٹ اتھارٹی (این ڈی ایم اے) اور ضلعی انتظامیہ کو متاثرہ علاقوں میں ریسکیو آپریشن جاری رکھنے کی ہدایت کر دی۔ جبکہ بارشوں کے 2 نئے سلسلوں کے پیش نظر امدادی سرگرمیاں تیز کرنے کی ہدایت بھی کر دی۔
وزیر اعظم نے ہدایت کی کہ زیریں علاقوں میں سیلاب سے نمٹنے کے لیے مکمل تیاریاں رکھی جائیں۔ جبکہ ندی نالوں اورقدرتی آبی گزرگاہوں کے گرد تعمیرات روکنے کے لیے قومی مہم چلائی جائے گی۔
انہوں نے کہا کہ حالیہ بارشوں اور سیلاب سے متاثرہ لوگوں کی مدد قومی فریضہ ہے۔ متاثرین کی ریسکیو اور امداد کے بعد ان کی بحالی کا کام شروع کیا جائے گا۔ اور تمام متاثرین تک طبی امداد اور امدادی سامان کی فراہمی کو ہر حال میں یقینی بنایا جائے۔
یہ بھی پڑھیں: پیپلز پارٹی اور ن لیگ کا ضمنی انتخابات مل کر لڑنے کا اعلان
وزیر اعظم نے این ڈی ایم اے کو ہدایت کی کہ سیلابی خطرات کے پیش نظر صوبائی اداروں سے رابطہ رکھا جائے۔
شہباز شریف نے گلوف کی قبل از وقت اطلاع دینے پر گلگت بلتستان کے علاقے غذر کے رہائشی وصیت خان کو خراج تحسین پیش کرتے ہوئے کہا کہ وصیت خان نے گلوف کا خطرہ بھانپ کر گاؤں والوں کو بروقت خبردار کیا۔ اور جانی نقصان سے بچاؤ ممکن ہوا۔