اسلام آباد: وزیر اعظم شہباز شریف نے حالیہ بارشوں میں کسی بھی قسم کی ہنگامی صورتحال سے نمٹنے کے لیے این ڈی ایم اے، ریسکیو اداروں اور انتظامیہ کو ہائی الرٹ رہنے کی ہدایت کر دی۔
وزیر اعظم نے دریائے سندھ اور دیگر دریاؤں سے ملحقہ علاقوں میں ممکنہ سیلابی صورتحال کے پیش نظر این ڈی ایم اے، ریسکیو اداروں اور انتظامیہ کو فوری حفاظتی انتظامات و اقدامات نافذ کرنے کی ہدایت کی۔
شہباز شریف نے این ڈی ایم اے کو صوبائی ڈیزاسٹر مینجمنٹ اتھارٹیز سے سیلابی صورتحال سے نمٹنے کے لیے تعاون مزید مربوط بنانے اور صوبائی حکومتوں اور دیگر متعلقہ اداروں کے ساتھ قریبی روابط مضبوط کرنے کی ہدایت کر دی۔
وزیر اعظم نے پاکستان ٹیلی کمیونیکیشن اتھارٹی (پی ٹی اے) کو عوام کو آگاہ رکھنے کے لیے تمام دستیاب ذرائع سے حقیقی و تازہ صورتحال سے آگاہ کرنے کی ہدایت کرتے ہوئے کہا کہ تربیلا ڈیم سپل وے آپریشن سے دریائے سندھ کے زیریں اضلاع میں طغیانی بڑھنے کا خدشہ ہے۔
یہ بھی پڑھیں: کسی بھی جارحیت کا سوچ سے بڑھ کر سخت جواب دیا جائے گا، فیلڈ مارشل
شہباز شریف نے کہا کہ تمام صوبوں کی انتظامیہ سیلابی صورتحال کے پیش نظر عوام کے لیے مؤثر آگاہی مہم جاری رکھے۔
انہوں نے کہا کہ نیشنل ایمرجنسی آپریشن سینٹر میڈیا پر غیر محفوظ اور کم محفوظ علاقوں کی وضاحت کرے۔ جہاں پر اونچے، درمیانے اور کم درجے کے سیلاب کا خطرہ ہے تاکہ عوام کو بروقت انتباہ کیا جاسکے۔
وزیر اعظم نے ہدایت کی کہ یقینی بنایا جائے کہ صوبوں کی انتظامیہ کسی بھی صورتحال سے قبل از وقت نمٹنے کے لیے اپنی تیاری مکمل رکھے۔ اور این ڈی ایم اے اس امر کو یقینی بنائے۔