پشاور: الیکشن کمیشن کا خیبرپختونخوا اسمبلی میں مخصوص نشستوں کی تقسیم کا اعلامیہ پشاور ہائیکورٹ نے کالعدم قرار دے دیا۔
پشاور ہائیکورٹ نے خیبرپختونخوا اسمبلی میں مخصوص نشستوں کی تقسیم کے خلاف دائر مسلم لیگ ن کی درخواست منظور کرتے ہوئے الیکشن کمیشن کو دوبارہ مخصوص نشستوں کی تقسیم کی ہدایت کر دی۔
عدالت نے دو صفحات پر مشتمل مختصر تحریری فیصلہ جاری کر دیا۔ فیصلہ جسٹس ارشد علی نے تحریر کیا جس کے مطابق ہائیکورٹ نے الیکشن کمیشن کی جانب سے مخصوص نشستوں کی تقسیم کا فیصلہ کالعدم قرار دے دیا۔
فیصلے کے مطابق الیکشن کمیشن کا مخصوص نشستوں کی تقسیم کے لیے کیا گیا 22 فروری 2024 کا فیصلہ غیر قانونی اور آئین کے آرٹیکل 106 کے خلاف ہے۔ یہ فیصلہ الیکشن ایکٹ 2017 رول 92 کے خلاف ہے۔
یہ بھی پڑھیں: راولپنڈی میں 8 ارب 77 کروڑ روپے کے میگا پراجیکٹس کا افتتاح
عدالت نے اپنے فیصلے میں کہا کہ آئین و قانون کے مطابق الیکشن کمیشن خیبرپختونخوا اسمبلی کی 20 مخصوص نشستوں کی تقسیم کرے۔ الیکشن کمیشن خواتین اور اقلیتوں کی مخصوص نشستوں کی دوبارہ ایلوکیشن کریں۔ الیکشن کمیشن 10 دنوں کے اندر ایلوکیشن کو یقینی بنائے۔
عدالت نے تمام جماعتوں یا ان کے نمائندوں کو سننے کے بعد فیصلہ جاری کیا۔ عدالت نے متعلقہ فریقین کو حلف لینے سے روک دیا۔