خیبرپختونخوا میں سرکاری ملازمین کیلئے احساس ای پنشن سسٹم کا اجراء کر دیا گیا۔
خیبرپختونخوا میں ای پنشن سسٹم یکم جنوری 2026 سے نافذ العمل ہو گا، وزیراعلیٰ خیبرپختونخوا علی امین گنڈا پور نے ای پنشن سسٹم کی منظوری دے دی۔
وزیر اعلی سیکرٹریٹ نے ای پنشن سسٹم کے اجرا کے لیے کانسپٹ پیپر تیار کر لیا ہے، جسے عملی شکل دینے کے لیے محکمہ خزانہ کو احکامات جاری کردیے گئے ہیں۔
پنڈی بھٹیاں ، سیلاب سے متاثرہ 111 دیہاتوں کے تعلیمی اداروں کی تعطیلات میں مزید توسیع
صوبائی حکومت کے انقلابی قدم سے جنوری سے نئے پنشنرز کو پنشن کی ادائیگی ای پنشن سسٹم کے تحت کی جائے گی، پیپر بیسڈ پنشن نظام کو مکمل پیپر لیس ای پنشن نظام میں تبدیل کر دیا جائے گا۔
اس مقصد کے لیے احساس پنشن ڈیش بورڈ کا اجرا کیا جائے گا، یہ ڈیش بورڈ ویب بیسڈ پلیٹ فارم ہو گا جو مکمل طور پر پیپر لیس ورک فلو پر مشتمل ہو گا، ای پنشن سسٹم کے تحت ملازمین ریٹائرمنٹ سے 6 ماہ قبل پورٹل پر ایک سادہ ڈیجیٹل فارم پر کر کے پنشن کیس داخل کرا سکیں گے۔
تمام ضروری دستاویزات بھی محفوظ طریقے سے اسکین کرکے براہ راست پورٹل پر اپ لوڈ کئے جا سکیں گے اور سسٹم خودکار طریقے سے متعلقہ حکام کیلئے ٹائم باؤنڈ ٹاسکس تخلیق کرے گا، نئے سسٹم کے تحت کسی بھی مرحلے میں ایک بھی فزیکل فائل یا پیپر استعمال نہیں ہو گا۔
ویری فکیشن اور منظوری کا تمام عمل بھی ڈیجیٹل سسٹم کے ذریعے ہی مکمل کیا جائے گا۔ سسٹم خودکار طریقے سے سینکشن آرڈر، ریٹائرمنٹ آرڈر، پنشن پیپرز اور پنشن پیمنٹ آرڈر تیار کرے گا۔ یہ تمام آرڈرز ڈیجیٹل دستخط شدہ ہوں گے جو قانوناً قابل قبول ہوں گے۔
سندھ کے مختلف شہروں میں نشیبی علاقے زیر آب، ملک میں مزید بارشوں کی پیشگوئی
وزیراعلیٰ سیکرٹریٹ کا کہنا ہے کہ وزیر اعلیٰ، چیف اور سیکرٹری خزانہ ڈیش بورڈ پر کارکردگی کو مانیٹر کریں گے، مقررہ ٹائم لائن کے اندر پنشن ریٹائرڈ ملازم کے بینک اکاؤنٹ میں منتقل کر دی جائے گی۔
ای پنشن نظام کو دیرپا بنانے کیلئے متعلقہ قوانین میں ضروری ترامیم تجویز کی گئی ہیں، وزیراعلیٰ خیبرپختونخوا علی امین گنڈا پور نے کہا کہ آن لائن نظام سے پنشنرز کو پنشن کیلئے دفاتر کے چکر نہیں لگانا پڑیں گے۔