اسلام آباد: سپریم کورٹ نے فیصلے میں کہا ہے کہ بینک کا گوشوارہ آمدن ثابت کرنے کے لیے کافی نہیں ہے۔
چیف جسٹس سپریم کورٹ یحییٰ آفریدی کی سربراہی میں 2 رکنی بینچ نے کیس کی سماعت کی۔ جسٹس شفیع صدیقی کا تحریر کردہ فیصلہ جاری کر دیا گیا۔
سپریم کورٹ کے فیصلے میں کہا گیا کہ صرف رقم کی منتقلی آمدن کا ثبوت نہیں سمجھی جا سکتی۔ اور مالی لین دین کا ریکارڈ خودبخود آمدن نہیں کہلاتا۔ بغیر واضح اور قابل بھروسا ثبوت کے نوٹس جاری نہیں کیا جا سکتا۔
عدالت نے کہا کہ محض شک یا اندازے پر ٹیکس کی جانچ نہیں ہو سکتی۔ اور اکاؤنٹ میں موجود رقم کو بلاوجہ خفیہ آمدن قرار نہیں دیا جا سکتا۔
محکمہ ٹیکس کی نظر ثانی کی کارروائی کو بھی غیرقانونی قرار دے دیا گیا۔ آمدن ثابت کرنے کے لیے مخصوص اور ٹھوس معلومات لازمی ہیں۔ جبکہ معلومات کا براہ راست تعلق ٹیکس کے قابل آمدن سے ہونا چاہیے۔
یہ بھی پڑھیں: ہم وہ نسل ہیں جو تاریخ کی زنجیریں توڑے گی، بلاول بھٹو زرداری
فیصلے کے متن میں کہا گیا کہ محض بینک کا ریکارڈ قانون کے تحت کارروائی کے لیے کافی نہیں۔ محکمہ ٹیکس کا مؤقف مسترد کرتے ہوئے شہری کو رعایت دے دی گئی۔ اور غیرمصدقہ معلومات پر مبنی کارروائی کو غلط قرار دے دیا گیا۔
عدالت نے کہا کہ ٹیکس قانون کے غلط استعمال کو روکنے کی ضرورت ہے۔ اور ہر اطلاع کی جانچ پڑتال ضروری ہے۔ جبکہ ہر کارروائی شفاف ثبوت پر مبنی ہونی چاہیے۔