چیئرمین پیپلزپارٹی بلاول بھٹو زرداری کا کہنا ہے کہ مقبوضہ کشمیر میں یا باہر کسی بھی کونے میں دہشت گردی کا واقعہ ہو تو بھارت فوراً پاکستان پر الزام لگانا شروع کر دیتا ہے، بھارت نے بار بار ثابت کیا ہے کہ وہ غیر ذمہ دار ریاست ہے۔
ہم نیوز کے پروگرام “فیصلہ آپ کا” میں گفتگو کرتے ہوئے کہا کہ تیاریاں مکمل ہیں، انہوں نے ایک خطرناک محاذ کھول دیا ہے، آگے کیا ہوگا کچھ نہیں کہہ سکتا۔ ایک فیصلہ کرنا ہے کہ ایک دوسرے پر الزام تراشی جاری رکھنی ہے یا مل بیٹھ کر فیصلہ کرنا ہے کہ خطے کو اس ایشو سے آزاد کروانا ہے۔
بلاول بھٹو نے کہا کہ بھارت کو نیوٹرل انکوائری کا چیلنج دینا حکومت کا بہترین فیصلہ ہے۔ آئیں دودھ کا دودھ اور پانی کا پانی ہو جائے، بھارت انٹرنیشنل انکوائری سے بھاگ رہا ہے، ہم بار بار یہ دعوت دے رہے ہیں کہ سفارت کاری سے ہی مسئلے کو حل کیا جائے۔
انہوں نے کہا ہے کہ دونوں ممالک کی انٹیلیجنس ایجنسیاں مل کر کام کریں اور اس طرح کے واقعات کے سہولت کاروں کو پکڑیں۔ بھارت کی نہ بات کرنے میں سنجیدگی ہے اور نہ ہی ساتھ دینے میں۔
بلاول بھٹو نے کہا کہ مودی کا بھارت انتہا پسند بنتا جا رہا ہے، اس کے اثرات پاکستان اور خطے پر پڑ رہے ہیں، کسی بھی جنگ میں ایسا اقدام نہیں کیا گیا، لیکن بھارت نے وہ کر دیا، اس اقدام کی سخت مذمت کرتے ہیں۔
پہلگام واقعہ بھارت کی اپنی نااہلی ہے،الزام پاکستان پر عائد نہیں کیاجاسکتا،بلاول بھٹو
مزید کہنا تھا کہ سندھ طاس معاہدہ دنیا میں مثال کے طور پر پیش کیا جاتا ہے، بھارت انٹرنیشنل لا کو نہیں مانتا، اقوامِ متحدہ بھارت کی مرضی نہ مانے۔ پاکستان پر جو الزامات لگائے جاتے ہیں، اسے دنیا نہیں مانتی۔
بلاول بھٹو زرداری کا کہنا ہے کہ پاکستان کے امریکا کے ساتھ پرانے تعلقات ہیں، لیکن ہم اپنے ہمسائے تبدیل نہیں کر سکتے۔ جیو پالیٹکس میں سپر پاورز کا جھگڑا آہستہ آہستہ بڑھتا جا رہا ہے، دنیا کو نظر آ رہا ہے کہ بھارت خوشی سے اس میں حصہ بھی لے رہا ہے اور فائدہ بھی۔
انہوں نے کہا کہ ہمیں اس خطے میں ہی رہنا ہے، ایک دوسرے کے ساتھ رہنا ہے، ہمیں چاہیے کہ ہم استعمال نہ ہوں۔