لاہور: وزیر اعلیٰ پنجاب مریم نواز نے کہا ہے کہ بھارتی قابض افواج آج کشمیر میں ڈوگرہ راج کے مظالم دہرا رہی ہیں۔
وزیر اعلیٰ پنجاب مریم نواز نے اپنے ایک بیان میں کہا کہ 13 جولائی 1931 کے 22 شہداء سمیت ہر کشمیری شہید کو سلام جو ظلم کے خلاف حق کی صدا بنے۔ کشمیر کے شہداء نے 1931 میں ڈوگرہ راج کو للکارا آج بھارتی قابض فوج انہی مظالم کی داستان دہرا رہی ہے۔
انہوں نے کہا کہ ڈوگرہ راج ہو یا آج کی ظالم بھارتی فوج، کشمیریوں کے حوصلے کو کبھی شکست نہیں دے سکے۔
مریم نواز نے کہا کہ کشمیر کے شہداء کی قربانیاں بتاتی ہیں کہ زنجیریں کبھی حوصلے کو قید نہیں کر سکتیں۔ کشمیر کی مٹی میں حریت، وفا اور قربانی کی خوشبو رچی بسی ہے۔
انہوں نے کہا کہ یوم شہداء کشمیر صرف محض ایک دن نہیں بلکہ یہ اقوام متحدہ اور پوری امت مسلمہ کے ضمیر کو جگانے کی صدا ہے۔ امریکی صدر ٹرمپ کا مسئلہ کشمیر کے حل پر حالیہ بیان حوصلہ افزا ہے۔ اور پاکستان ہر فورم پر کشمیریوں کی سیاسی، سفارتی اور اخلاقی حمایت جاری رکھے گا۔
یہ بھی پڑھیں: علی امین صرف بڑھکیں مارتے ہیں ، 90 روزہ تحریک حکومت بچانے کا بہانہ ہے ، عظمیٰ بخاری
وزیر اعلیٰ پنجاب نے کہا کہ کشمیری شہداء کی قربانیوں نے دنیا کو بتا دیا کہ کوئی جبر، کوئی طاقت اُن کو غلام نہیں رکھ سکتی۔
انہوں نے کہا کہ پوری پاکستانی قوم اپنے کشمیری بھائیوں کی ہر ایک تکلیف کو اپنی تکلیف سمجھتی ہے۔ ان کے دُکھ کو اپنا دُکھ سمجھتے ہیں اور پاکستان کا بچہ بچہ کشمیر کے حق خودارادیت کی جدوجہد میں اُن کے ساتھ کھڑا ہے۔