لاہور: پاکستان ریلوے نے لاہور سے کراچی تک تیز رفتار بلٹ ٹرین چلانے کے منصوبے کا اعلان کر دیا۔
پاکستان ریلویز نے لاہور سے کراچی بلٹ ٹرین چلانے کے منصوبے کا اعلان کیا۔ جس سے دونوں شہروں کے درمیان فاصلہ 5 گھنٹے میں طے ہو گا۔ لاہور سے کراچی تیز رفتار بلٹ ٹرین 2030 تک چلانے کا منصوبہ ہے۔
بلٹ ٹرین منصوبہ 1215 کلومیٹر طویل ہائی اسپیڈ ریل لائن چین پاکستان اقتصادی راہداری (CPEC) کے تحت 6.8 ارب ڈالر مالیت کے ایم ایل ون اپ گریڈ منصوبے کا حصہ ہے۔
وزیر ریلوے حنیف عباسی نے کہا کہ بلٹ ٹرین منصوبے میں چین کی معاونت شامل ہو گی۔ اور اسے چائنا ریلوے کنسٹرکشن کارپوریشن کی مدد سے مکمل کیا جائے گا۔
یہ بھی پڑھیں: کیش لیس اکانومی سے ہی کرپشن کا خاتمہ ممکن ہو گا، وزیر اعظم
بلٹ ٹرین کی رفتار 250 کلومیٹر فی گھنٹہ تک ہو گی۔ جبکہ اس کا راستہ حیدرآباد، ملتان اور ساہیوال جیسے اہم شہروں سے گزرے گا۔ منصوبے میں دہری نئی پٹڑیوں کی تنصیب، پرانے پلوں کی ازسر نو تعمیر اور جدید اسگنلنگ سسٹم کی تنصیب شامل ہے۔
حکام کے مطابق یہ منصوبہ نہ صرف عوام کے لیے تیز، آرام دہ اور محفوظ سفر فراہم کرے گا بلکہ اس سے ہزاروں ملازمتوں کے مواقع بھی پیدا ہوں گے۔