وزیراعظم شہباز شریف نے غزہ کے لیے امداد لے جانے والے گلوبل صمود فلوٹیلا پر اسرائیلی حملے کی شدید مذمت کرتے ہوئے اسے ’’بزدلانہ حملہ‘‘ قرار دیا ہے۔
وزیرِاعظم نے سماجی رابطے کی ویب سائٹ ایکس پر اپنے بیان میں کہا کہ پاکستان اسرائیلی فورسز کی جانب سے صمود غزہ فلوٹیلا پر حملے کی سخت مذمت کرتا ہے، جو 44 ممالک سے تعلق رکھنے والے 450 سے زائد انسانی حقوق کے کارکنان اور امدادی رضا کار لے جا رہا تھا۔
صمود فلاٹیلا پر حملہ ، کولمبیا کا اسرائیلی سفارتکاروں کو ملک بدر کرکے تجارتی معاہدہ ختم کرنیکا اعلان
شہباز شریف نے مزید کہا کہ ان کارکنوں کا جرم صرف یہ تھا کہ وہ غزہ کے مظلوم فلسطینی عوام کے لیے امداد لے کر جا رہے تھے۔
انہوں نے اسرائیلی جارحیت کو وحشیانہ عمل قرار دیتے ہوئے کہا کہ اس بربریت کو فوری طور پر ختم ہونا چاہیے اور امن کو موقع دینا چاہئے۔ فلسطینی عوام کو بنیادی انسانی امداد فراہم کرنے کیلئے فوری اقدامات کیے جائیں اور امداد ہر حال میں ضرورت مندوں تک پہنچنی چاہیے۔
صمود فلاٹیلا روکنا قابل مذمت ، کارکنوں کی گرفتاری عالمی قوانین کی خلاف ورزی ہے ، پاکستان
یاد رہے کہ اسرائیلی فوج نے حالیہ دنوں میں صمود فلوٹیلا کو غزہ پہنچنے سے روکنے کے لیے طاقت کا استعمال کیا، جس پر دنیا بھر میں احتجاج ہو رہا ہے۔