اسلام آباد: وفاقی وزیر برائے منصوبہ بندی و ترقی احسن اقبال نے کہا ہے کہ کوئی جنگ، کوئی طاقت پاکستان کو اقتصادی ترقی کے بنیادی ایجنڈے سے نہیں ہٹا سکتی۔
وفاقی وزیر برائے منصوبہ بندی و ترقی احسن اقبال نے اجلاس سے خطاب کرتے ہوئے کہا کہ بھارتی جارحیت کے خلاف پاک فضائیہ کے بروقت، مؤثر اور دلیرانہ جواب کو زبردست خراج تحسین پیش کرتے ہیں۔
انہوں نے کہا کہ پاکستان کے طیارے محض مشینیں نہیں ہیں۔ بلکہ یہ قومی وقار، فخر اور مادر وطن کے دفاع کے لیے غیر متزلزل عزم کی علامت ہیں۔ جو قوم اپنی سرزمین کا دفاع کرنا جانتی ہو اسے کوئی دشمن کبھی شکست نہیں دے سکتا۔
احسن اقبال نے کہا کہ پاک فضائیہ کے بہادر جنگجوؤں نے ایک تیز جوابی کارروائی میں پانچ ہندوستانی جیٹ طیاروں کو مار گرایا۔ جس سے یہ مضبوط پیغام گیا کہ پاکستانی قوم چوکس ہے۔ اور کسی بھی جارحانہ ارادے کا فیصلہ کن جواب دینے کی پوری صلاحیت رکھتی ہے۔ پاکستان کی مسلح افواج نے ایک مضبوط اور موزوں جواب دے کر دنیا کے سامنے وہ نتائج دکھائے۔ جو پاکستان کی طرف میلی آنکھ سے دیکھنے والوں کے منتظر ہیں۔
انہوں نے کہا کہ مجھے یقین ہے کہ اس کے بعد بھارت ایسی جارحیت کو دہرانے سے پہلے دس بار سوچے گا۔ تاہم دشمنی کا یہ عمل ہمیں ہمارے حقیقی ایجنڈے یعنی پاکستان کی معاشی ترقی سے نہیں روک سکتا۔
یہ بھی پڑھیں: تاریک رات کو چاندنی رات بنا دیا، یہ وقت اختلاف کا نہیں، وزیر اعظم کی اپوزیشن کو مذاکرات کی دعوت
وفاقی وزیر نے کہا کہ آج حقیقی قومی سلامتی کا براہ راست تعلق اقتصادی طاقت سے ہے۔ اور جب تک پاکستان معاشی طور پر مضبوط نہیں ہو گا۔ یہ اپنے عوام کے خوشحال مستقبل کو یقینی نہیں بنا سکتا۔
انہوں نے کہا ہمیں یہ سمجھنا چاہیے کہ اگر ہم اپنے ترقیاتی اہداف کو حاصل کرنا چاہتے ہیں۔ اور پاکستان کو ایک ترقی یافتہ ملک بنانا چاہتے ہیں۔ تو ہمیں معمول کے مطابق کاروبار کی ذہنیت سے الگ ہونا چاہیے۔ جدید دور مصنوعی ذہانت اور جدید ٹیکنالوجی سے چل رہا ہے۔ اور پاکستان کو اس عالمی رفتار کے ساتھ خود کو ہم آہنگ کرنا چاہیے۔