پاکستان تحریک انصاف (پی ٹی آئی) نے مئیر کراچی کے انتخاب میں پیپلز پارٹی کے امیدوار کی حمایت کرنے والے منحرف ارکان سے لاتعلقی کا باضابطہ خط الیکشن کمیشن کو ارسال کر دیا ہے۔
پی ٹی آئی کراچی کے صدر راجہ اظہر اور جنرل سیکریٹری ارسلان خالد کے دستخط سے بھیجے گئے خط میں کہا گیا ہے کہ منحرف ارکان پہلے ہی پارٹی سے اپنا تعلق ختم کرنے کا اعلان کر چکے ہیں اور وہ استحکامِ پاکستان پارٹی (IPP) سے وابستگی ظاہر کر چکے ہیں۔
پی ٹی آئی کے کل 31 ارکان کا نام خط میں شامل کرتے ہوئے ان سے باضابطہ لاتعلقی ظاہر کی گئی ہے۔
خط میں مؤقف اختیار کیا گیا ہے کہ منحرف ارکان کی جانب سے پارٹی پالیسی کی کھلی خلاف ورزی کی گئی، انہوں نے مئیر کراچی کے انتخاب اور کے ایم سی بجٹ میں پیپلز پارٹی کے حق میں ووٹ دے کر پارٹی فیصلے کے برعکس اقدام کیا۔
خط میں کہا گیا ہے کہ پی ٹی آئی نے مئیر کراچی کے لیے جماعت اسلامی کے امیدوار کی حمایت کا فیصلہ کیا تھا، مگر منحرف ارکان نے اس کے برعکس پیپلز پارٹی کے امیدوار کی حمایت کر کے پارٹی ڈسپلن توڑا۔
پاکستان تحریک انصاف مئیر کراچی کے حمایت یافتہ منحرف پی ٹی آئی ارکان کے خلاف متحرک
پاکستان تحریک انصاف نے منحرف ارکان سے لاتعلقی کا خط الیکشن کمیشن کو بھی ارسال کردیا
پاکستان تحریک انصاف کراچی کے صدر راجہ اظہر خان، جنرل سیکرٹری ارسلان خالد نے صوبائی الیکشن کمیشن کو خط لکھا… pic.twitter.com/aWxocrIpfp
— PTI Sindh Updates (@ptisindhupdates) October 31, 2025
پارٹی نے واضح کیا ہے کہ ان ارکان کی پارٹی رکنیت 6 جون 2023 کو باضابطہ طور پر ختم کی جا چکی ہے، اور یہ فیصلہ پارٹی پالیسی کی مسلسل خلاف ورزیوں کے باعث کیا گیا۔
پی ٹی آئی نے الیکشن کمیشن سے مطالبہ کیا ہے کہ نااہلی سے متعلق زیرِ التواء کیس کے فیصلے تک منحرف ارکان کو آزاد امیدوار کے طور پر تسلیم کیا جائے۔
پی ٹی آئی کراچی نے ایک الگ خط کے زریعے مئیر کراچی کو بھی ان ارکان سے لاتعلقی کے بارے آگاہ کیا ہے۔