عمر ایوب اور شبلی فراز کی نااہلی سے متعلق اپیلیں واپس لے لی گئیں

چیئرمین تحریک انصاف بیرسٹر گوہر نے عمر ایوب اور شبلی فراز کی نااہلی سے متعلق سپریم کورٹ میں دائر اپیلیں واپس لے لیں۔

بیرسٹر گوہر نے عدالت کو بتایا کہ عمر ایوب کی ہدایت پر ان کی نااہلی کے خلاف اپیل واپس لے رہے ہیں کیونکہ وہ خود الیکشن میں حصہ نہیں لے رہے ، ان کی نشست پر ان کی اہلیہ انتخابات میں حصہ لیں گی۔

اس کے علاوہ شبلی فراز کو سینیٹ میں قائدِ حزبِ اختلاف کے عہدے سے ہٹانے سے متعلق اپیل بھی واپس لے لی گئی۔

مزید پڑھیں:انصاف تک رسائی مزید آسان ، سپریم کورٹ نے عوامی پورٹل کا آغاز کر دیا

سپریم کورٹ نے کہا کہ شبلی فراز کی خالی نشست پر 30 اکتوبر کو الیکشن ہونا ہے، اس لیے کیس 29 اکتوبر کو مقرر کیا جائے گا۔  عدالت نے استفسار کیا کہ کیا ملزمان نے سرنڈر کر دیا ہے؟ جس پر بیرسٹر گوہر نے بتایا کہ عمر ایوب اور شبلی فراز نے تاحال سرنڈر نہیں کیا۔

بیرسٹر گوہر نے بتایا کہ قومی اسمبلی میں قائدِ حزبِ اختلاف کو ڈی نوٹیفائی کرنے کے خلاف دائر اپیل بھی واپس لی جا رہی ہے، کیونکہ محمود خان اچکزئی کو اپوزیشن لیڈر مقرر کرنے کا نوٹیفکیشن جاری ہو چکا ہے۔

پی ٹی آئی رہنما عمر ایوب اور زرتاج گل کے وارنٹ گرفتاری جاری

بیرسٹر گوہر کا کہنا تھا کہ سرنڈر نہیں کیا گیا، یہاں سوال سول نوعیت کا ہے، فوجداری نہیں، شبلی فراز کی حد تک ہم کیس چلانا چاہتے ہیں۔

بعد ازاں عدالت نے شبلی فراز کی اپیل پر نوٹسز جاری کرتے ہوئے کیس کی سماعت 29 اکتوبر تک ملتوی کر دی۔