سیکریٹری ہوم پنجاب فضل الرحمان کا کہنا ہے کہ ٹی ایل پی کے سربراہ سعد اور انس رضوی ہمارے پاس نہیں ہیں، انہیں ان کے ساتھی چھڑوا کر لے گئے تھے۔
اپنے بیان میں انہوں نے کہا کہ اگر وہ خود کو قانون کے حوالے کردیتے ہیں تو قانون کے مطابق کارروائی ہوگی۔
ان کا کہنا تھا کہ ہم نے 10 لاکھ سے زیادہ لائسنس د یئےہوئے ہیں، غیر قانونی اسلحے کی کم از کم سزا 4 سے 7 سال اور 10 لاکھ جرمانہ ہے جب کہ غیر ممنوعہ بور کی سزا 7 سال سے 10 سال اور 10لاکھ جرمانہ ہے۔
بولے کہ جو جو اہل ہوگا اس کو ہی صرف لائسنس ملے گا۔
ٹی ایل پی کالعدم جماعت قرار؛ وزارت داخلہ نے نوٹی فکیشن جاری کردیا
دوسری طرف وزارت داخلہ نے وفاقی کابینہ کی منظوری کے بعد تحریک لبیک پاکستان (ٹی ایل پی) پر پابندی لگانے کا نوٹیفیکشن جاری کر دیا۔
نوٹیفکیشن کے مطابق ٹی ایل پی کو کالعدم تنظیم قرار دے دیا گیا ہے۔ وزارتِ داخلہ نے کہا ہے کہ وفاقی حکومت کے پاس ایسی ٹھوس وجوہات موجود ہیں جن سے ظاہر ہوتا ہے کہ جماعت کے تانے بانے دہشت گردی سے جڑے ہوئے ہیں۔
نوٹیفکیشن میں مزید کہا گیا ہے کہ انسدادِ دہشت گردی ایکٹ 1997 کے تحت ٹی ایل پی کو فرسٹ شیڈول میں شامل کرتے ہوئے کالعدم جماعتوں کی فہرست میں باقاعدہ شامل کر لیا گیا ہے۔