ورجینیا بیچ سے تعلق رکھنے والی 100 سالہ رتھ لی مے نے یہ ثابت کر دیا ہے کہ عمر صرف ایک عدد ہے — فِٹ اور متحرک رہنے کے لیے جذبہ ہی اصل شرط ہے۔
رتھ لی مے ہفتے میں تین دن باقاعدگی سے جم جاتی ہیں، جہاں وہ ایک گھنٹے تک اسٹیشنری بائیک پر سائیکلنگ کرتی ہیں اور پھر ایک میل سے زائد پیدل چلتی ہیں۔
امریکی جریدے ٹوڈے کے مطابق، ماضی میں ماڈلنگ کے شعبے سے وابستہ رہنے والی رتھ اب بھی خود اپنا کھانا بناتی ہیں۔
گھر کے کام خود انجام دیتی ہیں، اور حیرت انگیز طور پر 98 سال کی عمر تک گاڑی بھی چلاتی رہیں۔
ان کی 78 سالہ بیٹی انیٹ پارکر اپنی والدہ کے ساتھ ہی رہتی ہیں اور ان کی ورزش کی ساتھی بھی ہیں۔
رتھ کے مطابق، “حرکت میں برکت ہے، اور مثبت سوچ ہی لمبی عمر کا راز ہے۔”
حرکت میں برکت
رتھ کا کہنا ہے کہ جسم کو متحرک رکھنا لمبی عمر کی سب سے بڑی کنجی ہے۔ وہ ہر صبح ہلکی ورزش کرتی ہیں جیسے اسٹریچنگ، گھٹنوں کو اوپر اٹھانا، ٹانگوں کی حرکت اور ہلکے وزن اٹھانا۔
جم کے دنوں میں وہ آدھا گھنٹہ بائیک چلاتی ہیں، پانچ منٹ آرام کرتی ہیں، پھر آدھا گھنٹہ مزید سائیکلنگ کرتی ہیں، اس کے بعد ایک میل سے زائد واک کرتی ہیں۔
ان کی پسندیدہ ورزش واکنگ ہے۔ وہ کہتی ہیں،’میں جب بھی چلتی ہوں تو خود کو بہتر محسوس کرتی ہوں۔ پہلے میں روز چار میل واک کرتی تھی۔‘
افریقی بادشاہ کی 15 بیویوں اور 100 خادموں کے ساتھ یو اے ای آمد، دیکھنے والے حیران
متوازن غذا
رتھ کی خوراک سادہ مگر صحت بخش ہے۔ ان کے ناشتے میں نان فَیٹ دہی، جئی ، کیلا، دودھ اور کبھی ایک انڈہ شامل ہوتا ہے۔
دوپہر اور رات کے کھانے میں وہ عموماً چکن، مچھلی یا ٹرکی کھاتی ہیں، جبکہ سرخ گوشت سے پرہیز کرتی ہیں۔
ان کے کھانے میں تازہ پھل اور سبزیاں خاص اہمیت رکھتے ہیں جس میں انگور، بلیو بیریز، پھلیاں، مکئی، بند گوبھی، سلاد اور پیاز شامل ہیں۔
وہ نمک کا استعمال کم کرتی ہیں، شراب نہیں پیتیں اورسگریٹ کو کبھی ہاتھ تک نہیں لگایا۔
ہفتے کی ایک چھوٹی سی ٹریٹ
رتھ ہر جمعے کو ایک خاص ٹریٹ ضرور لیتی ہیں۔ بال بنوانے کے بعد اپنے پسندیدہ ریسٹورنٹ میں دو ہاٹ ڈاگ کھاتی ہیں۔
ان کا کہنا ہے، ’مجھے مرچ، سرسوں اور پیاز کے ساتھ ہاٹ ڈاگ بہت پسند ہیں۔ یہ میرا ہفتے کا انعام ہے۔‘
وراثت سے بڑھ کر طرزِ زندگی
دلچسپ بات یہ ہے کہ رتھ کے خاندان میں کوئی بھی اتنی لمبی عمر نہیں پاسکا۔ ان کی والدہ 65 سال کی عمر میں کینسر سے چل بسیں اور والد 74 سال تک زندہ رہے۔
لیکن رتھ کا کہنا ہے کہ صحت مند عادات نے انہیں ہمیشہ مضبوط رکھا۔
خوشی کا راز: خود مختاری اور سماجی تعلقات
رتھ اب بھی اپنے گھر میں رہتی ہیں جہاں وہ 57 سال سے مقیم ہیں۔ ان کے لیے آزادی سب سے بڑی خوشی ہے۔ وہ محفلوں، تقریبات اور دوستوں کے ساتھ میل جول کو اپنی زندگی کا اہم حصہ سمجھتی ہیں۔
ان کی بیٹی کہتی ہیں، ’جب ماں باہر جاتی ہیں تو ہر کوئی ان سے بات کرنا چاہتا ہے۔ کبھی کبھی وہ چلنے سے زیادہ باتیں کرتی ہیں، لیکن یہی ان کی توانائی کا راز ہے۔‘
رتھ کا پیغام ہے کہ، ”حرکت میں رہیں، صحت بخش خوراک کھائیں، خوش رہیں اور زندگی کو بھرپور جئیں۔“